KRALENDIJK — Awe mèrdia net algu prome ku 2or trahadonan di Selibon a manifestá dilanti di sede di ABVO. Señor Franklin Domaccasse ku ta papia na nòmber di e trahadonan di Selibon a bisa notisia live 99 ku di e 48 trahadonan, 36 a bisa ku nan no ke keda ku e sindikato ABVO.
Nan ke un kambio pero ABVO ta strobando nan di kaba realisá e kambio pa bai un otro sindikato. Ne momentu nan aki e trahadonan a bisa ku nan a entrega nan karta di retiro kaba firmá, i banda di esei nan a inskribí nan mes kaba na e sindikato AFBW. Pero nan ta hopi rabia i ta pesei nan a bin protestá awe mèrdia dilanti di e sede di ABVO, paso ABVO no ke kaba atende e asuntunan pa nan por bai pa kaba. E trahadonan a sigui bisa ku nan no ke keda mas bou di ABVO, paso nan ta sinti ku ABVO no ta sali na nan vanguardia. Nan a mustra riba dos kaso separá di koleganan di Selibon ku a haña nan den problema i ABVO no a hasi net net nada pa nan, ta e kolega nan mes mester a buska nan propio abogado pa despues nan haña rason i banda di esei nan ta sinti ku ABVO Boneiru ta leun hopi banda di gerensia di Selibon anto esaki nan ta desaprobá kompletamente. Pues ne momentu nan aki segun sr. Franklin Domaccasse ku a papia na nòmber di e trahado nan di ku ta rabia ku e sindikato ABVO a bisa bon kla ku di e 48 trahadonan inskribi na ABVO, 36 ke retira di e sindikato ABVO i ku nan ta baiendo otro sindikato AFBW. Por ultimo sr. Franklin Domaccasse a bisa ku si no por keda kla ku e asuntu aki na un manera nèchi, anto e ora ei mester kana un otro un kaminda pero ku e sindikato ABVO nan no ta keda.

 

Share This
error: Content is protected !!