Riba 1 i 20 di òktober 2019 nos frakshon a hasi serie di pregunta por eskrito riba e respektativa tópiko
‘Derecho di Domisilio’ i ‘Kresementu sin Maneho’. Den e preguntanan aki nos a kuestioná e echo ku
tin kantidat kuantioso di persona ta establesé su mes na Bonaire sin ku tin un aparente maneho di parti
di Kolegio Ehekutivo pa mitiga e desaroyo aki. Riba ámbos tópiko Kolegio Ehekutivo a kontesta ku
NO tin un maneho establesé pa manehá fluho di hende ku ta bini Bonaire i alabes ku Kolegio
tampoko ta mira komo prioridat pa establesé un maneho pa frena e fluho aki.
Desde e preguntanan nan aki, den vários reunion públiko nos Frakshon a kuestioná e echo ku tin un
gran kantidat di persona ta bini Bonaire di espesialmente Hulanda pa establesé nan mes na Bonaire pa
un periodo di 3 pa 6 luna SIN ku nan ta inskribí nan mes den nos registro sivil pero si ta laborá riba e
isla sin paga impuesto, konsekuentemente kitando oportunidat di labor di e siudadano ku SI ta registrá
i biba na Bonaire.

Fuera ku, riba un manera di konkurensia inhustu nan ta kita pan for di riba mesa di nos siudadano ku
SI ta biba i ta registrá na Bonaire, nan ta pone un preshon adishonal riba e situashon ya prekario di
bibienda pagabel riba nos isla, dor di un demanda adishonal pa bibienda.
Ademas, nan forsa di kompra pa bibienda ta muchu mas ku esnan inskribí debí ku, komo hóben ku
ayudo di su mayornan ta bini riba fakansi i alabes traha sin paga impuesto, nan NO tin e gastunan
mensual ku e siudadano inskribí SI tin. Diariamente por mira ‘aviso’ riba medionan sosial di
hóbennan di Hulanda ku ta buska trabou i/òf bibienda den e forma aki na Bonaire.
E situashon aki ta kousa un problema sosio ekonómiko drástiko pa nos Pueblo i mester di atenshon
URGENTE di Kolegio Ehekutivo pa resolvé.
Konforme artíkulo 45 insiso 1 di Reglamentu di Órden di Konseho Insular nos kier hasi e siguiente
pregunta nan ku e petishon pa lo mas pronto ku ta posibel bokal den próksimo reunion:

1) Kolegio Ehekutivo ta konosí ku tin gran kantidat di hóbennan di Hulanda ku ta buska trabou
òf bibienda na Bonaire por medio di medionan sosial?

2) Kolegio Ehekutivo ta konosí ku e hóbennan ku ta bini Bonaire di Hulanda ta traha na Bonaire
sin inskribí nan mes den registro sivil?

3) Kolegio Ehekutivo ta di konosí ku personanan ku No ta inskribí no tin un number di CRIB i
por sierto nan ni e dunadó di trabou NO ta paga impuesto riba nan entrada?
Página 2 di 2

4) Kolegio Ehekutivo ta di akuerdo ku nos frakshon ku e desaroyo aki ta di preokupashon i ku
mester frena esaki ku sumo urgensia?
Artíkulo 13 di Akuerdo di Gubernamental di 22 di Aprel 2010 ta indiká ku kresementu sin maneho di
poblashon di Bonaire no ta kuadra ku mantenshon di kultura, propio karakter, medio ambiente i
naturalesa di Bonaire. Ku Bonaire i Hulanda lo traha hunta pa por frena kresementu di Poblashon di
Bonaire.

5) Kolegio Ehekutivo por informá Konseho Insular ki akshon KONKRETO Kolegio Ehekutivo
a tuma pa duna kontenido na e palabrashon aki hasi entre Gobièrnu di Bonaire i Estado di
Hulanda?

6) Kolegio Ehekutivo por informá Konseho Insular dentro di kuantu dia, Konseho Insular por
risibí un proposishon konkreto di Kolegio Ehekutivo kon ta bai frena kresementu di
poblashon di Bonaire i alabes personanan ku por laborá sin ku nan ta inskribí na Bonaire?

En espera di e kontesta nan supliká nos ta mantené.

Share This
error: Content is protected !!