Djabièrnè awor ta bai tin un referèndem pa trahadónan di Selibon disidí ku nan ta sigui
komo miembro di ABVO òf manera nos mayoria a disidí algun tempu kaba ku nos ta bai
afiliá na AFBW. Durante hopi tempu nos a bin ta nota ku ABVO no ta atendé ku nos
problemanan i nos preokupashon nan di trabou na un manera korekto. Hopi intento ku
nos a hasi pa mehorá e situashon no a duna resultado. Hopi abuso nos komo trahadó
di Selibon a pasa aden i te ainda ta pasa aden, sin ku nos sindikato ta atendé esaki nan
ku gerensia na un manera serio pa trese solushon nan duradero. Hopi di nos
kompañeronan di trabou a keda retirá na un manera inhustu sin ku ABVO tabata sali na
nan defensa. Nos tur sa kiko a pasa ku diferente di nos koleganan i kon gerensia ta
hasi i deshasí ku nos den trabou. Abusunan,menasanan i papia malu ku trahadó ta bon
konosí pa e gran mayoria di nos. Nos esfuersonan pa tin kontakto ku dirigentenan di
nos sindikato a laga hopi di deseá. Nan no ta kontestá telefòn, ni un ora no tin tempu pa
nos, miéntras ku e sede di ABVO na Yatobako en bes di ta un sede pa atendé ku
interesnan di e trahadó a para bira un negoshi pa e sindikato. Ki ora ku nos mester di
yudansa, mester yama Kòrsou i ta ora esakinan tin tempu ta bin atendé nos
problemanan aki na Boneiru. Nos lidernan na Boneiru mes no por tuma desishon riba
nan mes i tur ora nos mester tende ku ta DB(dagelijksbestuur) di Kòrsou mester atendé.

Esaki no ta un situashon saludabel i nos no ta mira ningun esfuerso pa trese kambio
den esaki tampoko. Nos ta kere ku aki na Boneiru mes tin sufisiente kapasidat pa nos
mes atendé ku nos asuntu nan. Nos por a tuma nota ku na momento ku nos den
mayoria a tuma e desishon pa desafiliá for di ABVO kuantu intigra, kuantu menasa i
kuantu manipulashon a i ta tumando lugá pa trata na kita nos derecho di skohe
libremente e sindikato ku nos ta deseá pa representá nos. I nos no ta e promé
kompania, kaminda e trahadónan pa motibu di malkontentu a bandoná ABVO. Nos por
menshoná Stinapa, Contour Global, Fundashon Cas Boneriano i últimamente BONLAB.

Ta parse ku e sindikato su interes ta solamente kobra nos kontribushon tur luna, biaha
bin Boneiru, hür outo keda den hotèl i chill en bes di buska solushon pa nos
problemanan. I nos sa ku tin mas kompania kaminda ABVO tin representashon, ku e
trahadónan miembro no ta kontentu. Den e último siman nan basta preshon, menasa i
hasta ofertanan dudoso a keda ofresé pa trahadónan no bandoná ABVO. Pero pa nos
ku ta mayoria nos a bisa ta basta i nos kier ta afiliá na un sindikato ku tur ora su
portanan ta habrí i tur ora tin lidernan pa atendé ku nos problema i preokupashonnan.

Ta nos derecho di skohe e sindikato ku nos ta kere ku ta sirbi nos interes nan mihó.
I nos kier hasi esaki den tur libertat i sin ningun klase di preshon. Ta p’esei djabièrnè
awor sin ningun klase di miedo i den tur libertat nos ta bai e referèndem ku e
konvikshon i ku e siguransa ku nos komo mayoria lo vota pa AFBW representá nos na
Selibon. I ta bon pa nos tur sa ku e CAO vigente ta keda intakto i ku tur e akuerdonan
ku tin den e CAO aktual lo keda na vigor. Nan ta firmá pa tantu Selibon komo ABVO. E
loke ta kambia ta ku en bes di ABVO ta AFBW lo bira e sindikato ku lo sigui vigilá pa

Selibon kumpli kabalmente ku tur e akuerdonan ku tin den e CAO. Pues no laga ningun
hende gaña bo ku si bo vota pa AFBW lo bo pèrdè. E referèndem di djabièrnè awor lo
ta unu históriko pa nos komo trahadó di SELIBON. Nos lo demonstrá na mundu
kompleto ku nos a lanta para pa nos derechonan sin miedo. Pues no ta kedami nada
otro pa hasi un apelashon na tur esnan ku por vota djabièrnè awor pa demonstrá union
i den un forma masal basha nos voto riba AFBW. Mi tin sigur ku hasiendo esaki,
trankilidat lo reina na boka di trabou di Selibon atrobe i huntu nos lo ban traha pa mihó
kondishonnan di trabou kaminda ta bai eksigí rèspèt pa nos i ku ta trata nos komo
hende ku dignidat. Nos trabou ta hopi importante i nos sa ku nos tin sosten di henter
komunidat pa e trabou ku nos ta hasi diariamente. Nos ta deseá awor pa tantu
Gerensia di Selibon, i otronan balorá esaki i den AFBW nos lo tin un sindikato ku a
demonstrá di ta traha serio, ta traha habrí ku su miembronan, tin konosementu i ta pone
solamente un interes dilanti, esta INTERES DI E TRAHADO DI SELIBON. Mi no tin
ningun duda ku nos gran mayoria ta di akuerdo ku mi i ku nos lo para huntu djabièrnè
awor komo sòldánan sin miedo. Laga pa djabièrnè atardi ora e resultado ta konosí
komo un famia grandi nos bai selebrá nos promé viktoria den e lucha ku nos lo bai hiba
na interes di e trahadónan di Selibon i nan famia.
Franklin Domacasse i tur trahadónan mal kontentu.

Share This
error: Content is protected !!