Dutch Caribbean Nature Alliance a ekspresá na Den Haag su preokupashon tokante e falta di atenshon pa asuntu relashoná ku e konsekuensianan di kambio di klima den Karibe Hulandes. Maske ku e promé minister di Hulanda Mark Rutte durante su intervenshon den e Reunion General di Nashonnan Uní na sèptèmber a menshoná e konsekuensianan di kambio di klima den Karibe Hulandes, tin masha tiki akshon konkreto i sosten pa e krísisnan mas impaktante ku habitantenan di Karibe Hulandes ta bai konfrontá den futuro serkano. E deklarashonnan di e ret di kontakto regional pa mantenshon di naturalesa ta bini na bíspera di apertura di CoP26 ku ta tuma lugá di 1 di novèmber te ku 12 di novèmber na Glasgow, Eskosia.

 

“Apesar ku ta di apresiá ku polítika hulandes den último tempu ta menshoná kambio di klima, nos ta sinembargo preokupá ku tin muchu tiki atenshon pa e impakto ku kambio di klima lo tin riba e parti Karibense di Reino Hulandes, maske ku ta transparente ku e habitantenan di e área karibense – ku ta e foko di biodiversidat di e Reino Hulandes – ta kore dilanti den e krísis di klima”, segun komentario di e direktor di  DCNA Tadzio Bervoets.

Bervoets a kontinuá menshoná ku durante enkuentronan ku nan a tene últimamente ku diferente parlamentario i direktorado na Hulanda, DCNA a asentuá e krísis eksistensial ku kambio di klima ta trese kuné.“Nos mester a rekordá polítikonan, burókratanan i teknokrátnan na Den Haag ku e diferente kombenionan i akuerdonan relashoná ku kambio di klima ku mester firma, ta Reino Hulandes ta ratifiká i no solamente Hulanda, anto komo tal mester tin mas tantu enfoke pa sigurá ku e islanan karibense ta mihó ekipá pa atendé ku loke ta spera di ta un krísis eksistensial. Te hasta nos mester a splika tópikonan manera oumento di orkan, blikiamentu di koral, invashon di sargassum i sekura na personanan ku por spera ku ta ekspertonan riba tereno di kambio di klima, kende no tabatin ningun idea di e impaktonan akí. Esaki ta algu ku tantu ta desapuntá bo komo ku ta algu alarmante,” Bervoets a sigui duna komentario.

E pronóstiko mas resien di kambio di klima di man di e Intergovernmental Panel on Climate Change (IPCC) ta alarmante i ta sugirí ku e islanan di Karibe Hulandes lo konfrontá kambionan klimatológiko denter di e siguiente dékadanan. IPCC a traha un proyekshon ku pa e Region di Karibe ta mustra ku un oumento di temperatura di 1.4°C lo duna komo resultado un oumento den e frekuensia i intensidat di insidente di wer ekstremo inkluso un oumento di 66% di intensidat di orkan, i un subimentu di nivel di laman di 0.5 pa 0.6m komo resultado di ekspanshon térmiko di awa i di dirtimentu glasial.

E pronóstikonan di kambio di klima akí ta espesialmente preokupante den e konteksto di un tendensia visibel kaba di kentamentu di temperatura. Averahe di temperaturanan na Karibe Hulandes segun sifranan resien a subi drástikamente den kurso di e último 40 aña segun. Na Kòrsou, investigashon ku Departamento Meteorológiko a hasi ta mustra ku den kurso di algun último dékada e isla a eksperensiá mas dia kayente i ménos anochi mas friu. Komo ku e islanan di Karibe Hulandes ta forma dos grupo geográfikamente distinto, separá pa mas ku 900 km di laman ganchu, e espektativa ta ku kambio di klima lo no tin un impakto di mesun forma riba e dos grupo di islanan akí. Aruba, Bonaire i Kòrsou ta keda den Sùit Karibe, un área ku ta pronostiká di bira mas kalor i seku, ku periodo di sekuranan mas largu. Saba, Statia ku St. Maarten, ku ta keda den Nortost Karibe i pues den e faha karibense di orkan, ta pronostiká di eksperensiá orkannan tropikal mas frekuente i violento, manera a sosedé durante e Periodo desastroso di Orkan 2017. Tur e ekosistemanan marino i terestre di Karibe Hulandes lo sufri efekto, na vários grado. Ta pronostiká ku ref di koralnan lo ta espesialmente vulnerabel komo ku temperatura di oséano mas haltu i e proseso di subimentu di ásido di oséano indudablemente lo resultá den insidente di blikiamentu masalmente di koral, entre otro.

E ekonomia di e islanan di Karibe Hulandes tambe ta dependé grandemente di turismo i por spera ku e pilá ekonómiko akí riba su mes tambe lo eksperensiá impaktonan drástiko: oumento di mal tempu i orkan por resultá den persepshon serka turistanan komo lugá no sigur; eroshon di playa i blikiamentu di koral por influensiá negativamente e persepshon riba atraktividat di destinashon; lo bai bini tambe un riesgo mas haltu di daño na propiedat di establesimentunan na kosta dor di orkan violento i otro mal tempu i òf daño na atrakshonnan turístiko. Na Boneiru, eroshon di playa a konsekuensia di pèrdida di ref den awa plat ta pone ku edifisionan históriko di plantashinan manera Washington Slagbaai Park ta bira vulnerabel.

Dutch Caribbean Nature Alliance (DCNA) a saka un edishon spesial grátis di nan boletin di notisia digital BioNews ku ta ilustrá e retonan ku Karibe Hulandes ta enfrentando den e lucha kontra kambio di klima.  Hasiendo uso di pronóstikonan di kambio di klima i rapòrtnan di investigashon internashonalmente akseptá, a stipulá impaktonan tantu marino komo terestre pa tur seis isla, suprayando e nesesidat pa akshon inmediato pa krea resiliensia kontra e efektonan di kambio di klima. Pèrdida di naturalesa tin konsekuensia negativo ku ta bai hopi leu pa e populashon lokal komo ku naturalesa ta para pa tantu un di e fuentenan mas importante di entrada komo ta ofresé protekshon kontra kondishonnan ekstremo di wer. Sinembargo, lo tin mester di un esfuerso kombiná pa sigurá ku naturalesa, bida i medionan di entrada no ta bai pèrdí pa motibu di a keda sin tuma akshon dor di agentenan di toma di desishon.

 

Foto: Marcel van der Kamp

Share This
error: Content is protected !!