Kralendjik – Dia 30 di òktober 2018 miembro di frakshon di MPB, Renata Domacassé den konseho insular, a entregá un moshon ku a keda aseptá unánimamente. E moshon a mustra riba e desperdisio di plèstik ku ta forma un problema grandi i ku 80% di tur desperdisio den oséanonan ta konsistí di plèstik. Esaki ta kondusí na formashon di konsentrashonnan gigantesko di desperdisio di plèstikku ta keda drif riba laman.

 

Mas ku klaro e tantísimo saku di plèstik – inkluso nos propio plèstik – ta forma un peliger grandi pa dos yoia di nos isla ku ta nos ref di koral ku ta stek ora e sakunan ku ta drif keda pegá i diferente spesi di animal den noslaman, entre otro nos turtuganan. E dos bunitesanan aki ta di sumo importante pa e habitante di Bonieru i tambe ta atrakshonnan prinsipal pa turismo. E moshon a instruí kolegio ehekutivo di entidat públiko di Boneiru drenta un trayekto pa yega na prohibishon di uso di baki di kuminda di fom, saku di plèstik desechabel ku ta usa un biaha so i tambe e richi di plèstik pa bebe kun’é, entrante promé di yanüari 2020.

 

Ku gran satisfakshon e frakshon di MPB a tuma nota di un karta di kolegio ehekutivo ku fecha 29 di aprel 2021, kaminda kolegio ehekutivo ta ofresé na konseho insular un ordenansa den konsepto ku lo bai prohibí uso di produktonan di plèstik desachabel. Mester menshoná tambe ku entre e ministerio di Infrastruktura di Hulanda i entidat públiko di Boneiru, dia 17 di yüli 2019 a keda firmá un deklarashon di intenshon, pa den fase eleminá produktonan di plèstik desachabel.

 

Den e reunion públiko di konseho insular dia 19 di òktoberúltimo, miembronan di konseho insular a bai di akuerdoku e ordenansa. MPB ta masha kontentu ku a buta man pa por a pasa un ordenansa di sumo importansia pa e isla di Boneiru. MPB ta konsiente ku ainda e guera no ta ganá i falta masha hopi mes pa hasi ainda, pa asina nos por skapa i drecha nos medio ambiente riba i bou di laman. Pa e motibu aki mes MPB ta enkurashá un bon koperashon entre organisashonnan manera Stinapa, Selibon i Ministerionan.

 

Miembro di frakshon di MPB, Edwin Domacassé a probechá di e okashon pa entregá un mas moshon ku ta instruí kolegio ehekutivo pa sigui amplia riba e ordenansa pa inkluí mas produktonan di plèstik desachabel ku ta dañino pa nos medio ambiente. Tambe a instruí kolegio ehekutivo pa sondeá e posibilidat i despues konhutamente ku konseho insular introdusí un asina yamá depósito (statiegeld) riba produktonan desachabel manera bòter di plèstik.

 

MPB ta di opinion ku hasiendo esaki Boneiru ta dal un paso signifikante den direkshon di durabilidat i ta yega mas serka na e meta di un ‘blue destination’ manera deskribí den e plan stratégiko di turismo Boneiru.

Share This
error: Content is protected !!