Kralendijk, Bonaire C.N.

Awe ta un dia históriko den e mundu sindikal na Boneiru, segun ami, awe despues di 42 aña ta bai tin un referèndem atrobe, entre ABVO i AFBW.
Loke mi por kòrda ta ku 42 aña pasa, den  aña 1979, mediador di gobièrnu sentral a tene un referèndem pa asina e trahadónan eligié a base demokrátiko ken nan ke pa ta nan representante.
Mi tabata presidente di AFBW e tempu ei i den e referèndem ei a tuma parti AFBW i BPWU, presidente di BPWU e tempu ei tabata hermano J. Landwier.

Si ami bai bek den historia i aktualmente, no a bini ningun kambio debí ku ta e mesun fechoria nan ta tumando lugá pa loke ta e referèndem entre ABVO i AFBW, ku mester bai wòrdu tene segun lei.

Ta kore un kampaña shushi, ta spanta trahadónan, alabes ta intimidá trahadónan ku ta okashoná intrankilidat laboral.

Den luna di aprel 2021 e sindikato AFBW a haña bishita di trahadónan mal kontentu , aktualmente  miembronan di ABVO. Na yüli 2021 atrobe a surgi un intrankilidat laboral,kaminda trahadónan di Selibon a bolbe aserka AFBW, ku e petishon pa bira miembro di AFBW, debí ku nan no tin e konfiansa mas den ABVO.  Direktiva di AFBW komo un federashon responsabel no por laga e trahadónan pa nan kuenta. AFBW a duna trahadónan un splikashon di e proseso ku mester  bai  tuma lugá. Pa kuminsá tur trahadó di Selibon ku ta miembro di ABVO mester entrega nan karta di retiro na ABVO alabes na gerensia di Selibon ofisialmente.

AFBW a pone sekretario di “dienstgroep” ABVO Boneiru korektamente na altura i a partisipá esaki den un reunion di USIBO tambe. Aktualmente AFBW tin 48 trahadó inskribí komo miembro di AFBW alabes a avisá gerensia di Selibon di e intrankilidat di miembronan registrá boluntariamente.

Lei di referèndem ta preskribí e siguiente:

Lei konflikto laboral 1946-BES.

Artíkulo 9 insiso 1;
E mediadó spesial por obligá pa aparesé dilanti di dje i eventual dilanti dje komishon doño di trabou i trahadó pertenesiendo na un partido, dirigentenan di sindikato ku ta òf ku su miembronan ta un di e partidonan i tambe testigunan i ekspertonan.

 

Insiso 2;
Es ku wòrdu demanda tin obligashon di aparesé i duna tur informashon deseá.

Insiso 3;
E mediadó spesial por duna òrdu na ekspertonan ku aprobashon di representante di reino pa hasi un investigashon.

Pa trese trankilidat laboral na Boneiru tantu AFBW komo Selibon a pidi mediador di gobièrnu den persona Sr. Anselmo Pontilius pa organisá un referèndem i haña klaridat ta kua di e sindikatonan tin  mayoria trahadó komo miembro. Demokrasia sindikal ta e prinsipio di kada trahadó individual pa skohe kua sindikato nan  ke afiliá na dje, “punto”.

AFBW ta keda pendiente pa ku e resultado.

Share This
error: Content is protected !!