Fundashon Plataforma Kultural komo Lider Atministrativo (Penvoerder) di e programa “Cultuureducatie met Kwaliteit Caribisch Nederland (CmK CN)”/ Edukashon di Kultura ku Kalidat Hulanda Karibense a inisiá deliberashon ku diferente partido. E programa ta bira realidat pa medio di fondo ku ‘Fonds voor Cultuurparticipatie’ ta pone disponibel. Tambe a sera un akuerdo di koperashon ku Entidat Públiko Bonaire. Den e programa akí Fundashon Plataforma Kultural ta bai traha huntu ku institutonan di enseñansa i kultura na Boneiru pa yega na un futuro vibrante i kreativo pa muchanan den enseñansa básiko.

Den kaso di e programa Edukashon di Kultura ku Kalidat (CmK-CN) ta trata di siña dirigí riba arte, herensia kultural i media pa medio di instrukshon dirigí, tantu den skol komo pafó di skol. E proyekto ta bai kuminsá pia pia den un marcha adekuá ku tur hende ta haña chèns di partisipá. Durante ‘CmK-CN’ e skolnan por inspirá otro i e kampo kultural i nan por duna otro un man pa sigui adelante.

Un bon koperashon entre e diferente partidonan ta esensial. Esaki ta tuma lugá pa medio di e asina yamá “Communities of Practice (CoP)”. Un CoP ta un grupo di partisipante ku ta siña huntu ku otro i di otro kon nan por kontinuá ku nan edukashon di kultura pa alumnonan. Aki tur e partidonan ta bini huntu i ta pone atenshon na desaroyo di vishon, training, traha un mapa kultural, kompartí konosementu i desaroyo di ekspertisio. En breve por bisa ku e partidonan partisipante òf “Communities of Practice (CoP)” ta forma e aspekto sentral den kon ta atendé i ta koperá ku otro den e proyekto.

Na mart 2020 a tuma lugá e promé entrenamentu di edukashon di kultura di LKCA (Landelijke Kennisinstituut Cultuureducatie en Amateurkunst/ Instituto Nashonal pa Edukashon di Kultura i Arte amatùr) na Hòfi Kultural. A partisipá entre otro skolnan, empleadonan enkargá maneho i dosentenan di arte ku ta traha pa fundashonnan kultural anto durante e training a komuniká ku otro tokante diferente punto di atenshon i ambishon di e diferente partidonan.

Banda di desaroyá e partidonan partisipante òf “Communities of Practice (CoP)”, e proyekto di Edukashon di Kultura ku Kalidat (CmK-CN) lo stimulá e ambiente kultural di e mucha pa medio di desaroyá ekspertisio di dosentenan di arte i maestronan, traha un Mapa Kultural i organisá aktividatnan kultural na skol. Pa sa mas tokante kon bo skol òf instansia kultural por partisipá na e programa akí por tuma kontakto ku Fundashon Plataforma Kultural pa medio di e direkshon di imeil info@plataformakultural.com

 

Share This
error: Content is protected !!