Siman pasá a finalisá promé fase di e proyekto di renobashon di Kolegio Kristu Bon Wardador (KKBW). For di despues di fakansi di Regatta, ta usa e lokalnan nobo pa alumnonan di grupo 1 te ku 3. Awor a kuminsá ku fase dos ku ta spera di entregá medio 2022.

Trabounan di e promé fase a konsistí di hasi pisonan abou resistente kontra orkan i temblor. Edifisionan a haña bentana nobo i a realisá adaptashonnan pa personanan ku desabilidat. A drecha interior i fèrf e kompleho di skol kompletu. Finalmente a invertí den un sistema di refrigerashon nobo i a drecha e dak di un forma duradero pa prevení lèkashi.

Di dos fase di e renobashon ta dirigí riba pisonan ariba, plenchi di hunga i sala di deporte. Na final di tur dos fase e skol ta kumpli ku tur norma stipulá i por sirbi añanan largu atrobe komo un digno kompleho eskolar. Alumnonan di grupo 4 te ku 8 ta bolbe e skol renobá despues di terminashon di fase dos. For di komienso di e trabounan, e muchanan ta alohá den edifisio di e skol anterior Papa Cornes na Kaya Barakuda.

Renobashon di KKBW ta parti di e proyekto di alohamentu di enseñansa. Denter di e proyekto akí Fundashon Propiedat Inmobil Boneiru (FPIB), na nòmber di Openbaar Lichaam Bonaire (OLB) i e ministerio di Enseñansa Kultura i Siensia (OCW), tin e tarea pa realisá edifionan eskolar nobo òf renobá na Boneiru. Por sigui progreso di e proyekto akí i demas proyekto di FPIB riba www.fpibonaire.com

 

Share This
error: Content is protected !!