KASHI DI KORIENTE NA KANDELA

Riba djárason 27 di òktober sentral di polis a risibí notifikashon  ku tin un kas na kandela na Kaya Rita. Na yegada di brantwer i patruya por a nota ku ekashi di koriente tabata ful pretu i ku tabatin un holó di huma den aire. Pero no tabatin kandela. Personal di brantwer a hasi un chekeo di hinter e kas. I despues ku WEB a kita e koriente, brantwer a spùit e kashi di kandela ku awa.

KIEBRO DEN KAS

Entre e anochi di djamars, 26 di òktober i e mainta di djárason, 27 di òktober, deskonosínan a forsa bentana di un kas situá na Kaya Dayenne pa a drenta i bai ku entre otro , vários joya. Ta investigando e kaso.

VÁRIOS KÒNTRÒL DI TRÁFIKO

Riba djaluna 25 i djamars 26 di òktober, a tene kòntròl di tráfiko planiá den oranan di mainta i atardi riba Bulevar E.E.G. i riba Kaya Internashonal. E kòntròl di tráfikonan aki tabata den kuadro di èksamen di e aspirantenan. Riba djaluna 25 di òktober , den oranan di mainta, a kontrolá 12 vehíkulo riba Bulevar E.E.G. , di kua 3 shofùr a haña un prosèsferbal; 2 pa manehá sin seguro bálido i 1 pa manehá sin reibeweis. Den oranan di atardi a kontrolá un total di 21 vehíkulo riba Kaya Internashonal i a duna prosèsferbal pa,entre otro, manehá sin reibeweis, sin seguro bálido i sin faha di seguridat bistí.

Riba djamars 26 di òktober a para i kontrolá 12 vehíkulo den oranan di mainta. Aki a duna 5 prosèsferbal: 2 pa manehá sin reibeweis, 2 pa manehá sin seguro bálido i 1 pa  manehá sin faha di seguridat. Den oranan di atardi a kontrolá 20 vehíkulo, di kua 7 shofùr a haña un prosèsferbal.  Esakinan tabata pa entre otro manehá sin reibeweis, sin seguro bálido i pa lus di patras defekto.  Ambos kòntròl a tumalugá riba Kaya Internashonal.

 KAS NA KANDELA

Den oranan di atardi riba djamars 26 di òktober, sentral di polis a risibí notifikashon ku tabatin un kas na kandela na Kaya Mercedes. Na yegada di polis i brantwer a resultá ku hinter a kas tabata na kandela. E habitante no tabata na kas. Brantwer a paga e kandela despues di kua por a nota ku e daño material tabata ekstenso. Kousa di e kandela no ta konosí.

Share This
error: Content is protected !!