E aña akí tambe ta bolbe organisá un ‘Online Study Fair’ pa e seis islanan Karibense di Reino. Riba dia 15, 17 i 26 di novèmber lo tin presentashonnan di diferente ‘Hogeschool’ i Universidat i riba dia 20 di novèmber lo tin tayernan (workshopnan) di forma digital. E feria di estudio lo ta habrí pa tur hende ku ke orientá pa por hasi un eskoho di estudio. Pues sòru pa bo partisipá!

A organisá e ‘Online Study Fair’ aña pasá pa promé biaha pa motibu di Covid 19. Komo ku el a kai asina na agrado di e públiko, a disidí di organisá esaki e aña akí tambe di forma digital. Di e manera akí presentashonnan di ‘Hogeschool’ i Universidatnan di nos islanan mes, di Hulanda i di Estádos Unídos / Canada ta disponibel pa tur alumno riba nos islanan. Na e momentunan akí tin mas ku 50 organisashon ku a registrá!

Rosemarijn de Jong, e kordinadó, ta splika dikon ta bolbe organisá e evento di forma digital: “Anteriormente e ‘Hogeschoolnan’ tabata haña ku ta un invershon demasiado grandi pa bin duna informashon riba nos islanan, mas ainda riba un isla asina chikitu manera Boneiru. Pa organisá un presentashon di forma digital ta mas fásil di manera ku hopi mas estudio por a registrá. Banda di esaki, nos a mira tambe ku e estudionan ta laga mas tantu studiante di Karibe dirigí palabra. Di e manera akí e informashon ta bira mas personal i e alumnonan riba nos islanan por hasi eksaktamente e preguntanan ku nan ta kana rònt kuné. Pa motibu ku nos ta organisá e evento akí pa tur e seis islanan, nos a sigui bou di un nòmber nobo: Study Choice Caribbean”.

Pa e programa provisorio i registrashon, bishitá studychoicecaribbean.com. Tur interesado pa e tayernan digital, por registrá nan mes. E presentashonnan ta tuma lugá riba e fechanan menshoná, di 8 ‘or di mainta te 2 ‘or di mèrdia; e tayernan riba djasabra dia 20 di novèmber ta kuminsá pa 9 ‘or di mainta. Esnan ku registrá nan mes, lo tin akseso tambe na tur grabashon despues. Di e manera akí tambe lo bo no pèrdè niun presentashon. Sea bon biní!

Share This
error: Content is protected !!