Mas i mas por tuma nota ku e situashon laboral na nos isla meresé atenshon. Ta realidat ku tin hopi empleo na Boneiru. E porsentahe di desempleo riba nos isla ta abou kompará ku riba nos hermana islanan, kaminda ekonomia ta down i no ta rekuperando ku e velosidat nesesario pa krea bienestar pa e klase trahadó i su famia. Sinembargo serka nos aki na Boneiru kaminda tin un desaroyo ekonómiko bastante positivo, mester tuma nota ku e kondishonnan laboral ta laga hopi di deseá. Un di e puntonan di preokupashon serka sindikalismo organisá ta ku e salario minimo ainda ta hopi abou i ta leu for di e eksistensia mínimo stipulá pa Regioplan. Miéntras ku e eksistensia mínimo ta stipulá na Usd.1350.00 pa luna pa un soltero, e sueldo minimo ta pará na Usd.950.00 pa luna. Pues un diferensha di Usd.400.00. Esaki ta nifiká ku nos tin pobresa serka e klase trahadó ku ta obligá nan pa traha dos te tres trabou pa asina nan por kumpli ku nan nesesidatnan básiko di tur luna. Pa kuminsá na trese alivio den esaki, partnernan sosial a yega na un akuerdo pa eliminá e diferensha aki ku un proposishon di oumento di e sueldo minimo di 10% pa aña durante 4 aña largu, kuminsando 1 di yanüari 2022. E punto aki a haña apoyo di Tweede Kamer i tur kos ta indiká ku gabinete Rutte lo bai na oumentá e sueldo minimo entrante 1 di yanüari ku 10%. Pero mesora mester bisa ku tin un menasa serio pa ku esaki, awor ku ta konosí ku e inflashon ta ser kalkulá na 4.3%. Esaki ta nifiká ku e forsa di kompra a bai atras ku 4.3% debí na oumento di kosto di bida riba nos isla. Si nos inkorporá esaki den relashon ku e oumento di 10% e lo nifiká ku den realidat e oumento real di salario minimo lo ta di 5.7%(10 – 4.3% = 5.7%). I si e tendensia aki kontinuá den e añanan benidero, nos lo no alkansá e 1350.00 dòlar pa luna manera proyektá den e Akuerdo di Kralendijk. Kiko lo por hasi. Na mi humilde opinion e aserkamentu mas hustu ku e gabinete por hasi ta no inkluí e inflashon den e oumento pero kalkulá esaki separá. En prinsipio esaki lo mester nifiká ku e oumento entrante 1 di yanüari 2022 no mester ta 10% so pero huntu kuné mester adaptá e sueldo minimo ku e sifra di inflashon ku 4.3%. Konkretamente esaki ta nifiká ku mester adaptá e sueldo minimo aktual ku 4.3% di 950 ku ta 40.85 dollar. E sueldo minimo aktual ta bira e ora ei 990.85. Antó despues ta oumentá e sueldo aki ku 10% ku ta 99.08 dòlar pa e sueldo minimo bira total entrante 1 di yanüari 2022 e suma di 1089.94. Pa ora esaki lo ta 6.29 dòlar. Te awor aki e sueldo minimo ta 5.48. Pues un oumento 0.81 pa ora. Ku esaki lo demonstrá ku e intenshon di gabinete Rutte sostené pa diferente moshon den Tweede Kamer ta serio pa yega na un eksistensia minimo i desente pa Boneiru.

Relashon sueldo minimo ku kompensashonnan sosial.

Ta e intenshon pa e sistema di duna kompensashon sosial(ònderstant) mester ta mará na sueldo minimo. E sistema ta basá ku kompensashon sosial(ònderstant) mester ta 70% di e sueldo minimo. Ta esei ta e punto di salida den e Akuerdo di Kralendijk. Den praktika esaki ta nifiká ku e kompensashon sosial minimalmente pa un soltero mester entrante 1 di yanuari 2022 bira despues ku oumentá e sueldo minimo 762 dòlar pa luna inkluso e adaptashon di inflashon. Ku esaki nos ta riba e kaminda pa aliviá pobresa i asina kumpli ku un di e 17 metanan di Nashonnan Uní pa na 2030 yega na eliminá pobresa den nos komunidat, kaminda ainda 30 pa 40% di nos poblashon ta biba bou di e eksistensia minimo.

Situashon na Bonlab

Atrobe trahadónan di Bonlab kual laboratorio tin un historia ku ta kuminsá for di aña 1969 ta den insertidumbre i inseguridat pa loke ta nan futuro empleo. Pa kolmo pará dilanti di negosashon pa un CAO nobo, nan mester a tende e notisia ku ZVK a disidí dos luna promé ku fin di aña ku nan lo no sigui ku e konvenio ku Bonlab i paga Bonlab pa e servisionan di laboratorio ku esaki ta duna na aseguradonan di Boneiru. Un desishon na nos pareser irresponsabel, un desishon sin tene kuenta ku prinsipionan di bon kondukta korporativo, un desishon ku ta violá e akuerdo aktual ku ta rigí pa e prinsipio di buena fe. Ademas e desishon aki, segun nos tin entendí no a bai ètòl den konsulta ku Gobièrnu di Boneiru, kual su posishon ta for di 2013 ku Boneiru mester tin minimal 2 laboratorio pa servisionan poliklinika i ademas Bonlab tin e tarea pa atendé komo laboratorio pa salubridat públiko. Klaramente por sinti ku tras di e desishon aki di ZVK tin un agènda pa eliminá Bonlab i pasa tur e trabounan aki den man di un solo entidat ku ta Fundashon Mariadal. Mi ta kontentu ku tantu e sindikato ku ta representá e trahadónan di Bonlab, esta AFBW i tambe trahadónan mes a aktivá mesora i a bati bèl na tantu gobièrnu di Boneiru komo na Konseho Insular ku huntu ta forma e gobernashon di nos isla pa kai den e asuntu aki i na interes di Boneiru no pèrmití e maniobra aki. Tantu gobiernu komo Konseho Insular tin e tarea i deber awor pa aktua komo gobernashon di e isla aki. Ta di apresiá ku Konseho Insular a tuma esaki hopi na serio i a konvoká un reunion di urgensia di komishon di Komunidat i Kuido pa awe djamars 2 di novèmber pa atendé e punto aki públikamente i trese klaridat pa pueblo. Interes i pan di por lo ménos 15 trahadó i nan famia ta na peliger o alomenos ta insigur. Na nos opinion tin espasio pa dos laboratorio na Boneiru i mester tin e madures pa nan dos traha huntu i komplementá i sostené otro pa por enfrentá kualkier situashon di kalamidat riba nos isla. Ministerio di salubridat públiko mes ta na fabor pa mas servisio di kuido riba nos isla, di moda ku e aseguradonan pa nan motibo por tin eskoho. Kondishonnan di kalidat di e servisio mester ta e guia pa eksistensia di e dos laboratorionan aki. Ademas nos no ta mira e nesesidat pa ekspandé nos hòspital ku mas servisio ku ya ta na su enkargo. Na nos pareser hòspital su tarea prinsipal ta kuido kurativo i no manehá laboratorio, botika i otro servisionan ku ya ela ekspandé su mes kuné. Nos ta spera ku pueblo en general i sindikalismo en partikular den esaki mester ta solidario ku trahadónan di Bonlab i mester manda un señal kla pa nos gobernantenan i nos representantenan den Konseho Insular ku komunidat ta para firme pa mantené Bonlab komo laboratorio. E relashon ku Ulanda ta basá riba e prinsipio di supsidiaridat i no riba e agènda di tuma tur tarea over for di Boneiru. Boneiru mester tin e espasio pa oumentá su outogobernashon riba tur tereno ku e ta kla pe i pa loke ta laboratorio esaki sigur ta e kaso.

Share This
error: Content is protected !!