Kralendijk – Durante un evento privá djabièrne pasá, a selektá studiantenan Luca Wanga i Louise van Loenen, bou di guia di artista Rosaly van Dansik, komo ganadónan final di e Sushi òf Dushi Kliko Challenge. Pronto nan por disfrutá di un all-inclusive keirumentu riba boto di Caribe Watersport en Water Taxi. MBO Bonaire, e skol kaminda studiante Luca ta bai, tambe a gana $1000 ku Caribbean Homes a spònser. E premio di públiko a bai na studiantenan Lola du Mee, Anabelle Verrips i Agatha Peralta, bou di guia di Elke Goldhoorn. Ku 466 votanan e bishitantenan di e evento i komunidat ku a vota riba social media, a skohe nan kreashon komo kliko favorito di e challenge. E studiantenan aki a gana kuater tickets di Salty Tours.

E evento a habri ku palabranan di Stacey Mac Donald, bosero di Wereld Natuur Fonds. El a splika kon a realisá e proyekto, danki na e kolaborashon di e partnernan i spònsernan Entidat Públiko Boneiru, Selibon N.V., Tourism Corporation Bonaire, STINAPA, Fundashon Plataforma Kultural, Caribbean Homes, Krioyo Paints, Salty Tours i Caribe Watersport en Water Taxi.

Deputadónan James Kroon i Hennyson Thielman a ekspresá gratitut na e organisadónan, partnernan i spònsernan di e proyekto di konsientisashon aki. Segun nan e proyekto aki a enserá mantenshon di medioambiente, edukashon i turismo; tur elementonan ku ta kontribuí na un Boneiru duradero.

Ku e ‘kliko rap’ komo ‘achtergrondmuziek’, e hóbennan a presentá nan kliko i a duna splikashon di nan obra di arte. E rèp ta konsistí di un mensahe importante, kual ta e importansia pa protehá naturalesa i e manera adekuá pa atendé ku shushi dor di seperá shushi. Juriëlla Josephia a skibi i graba e rèp spesial pa e challenge aki, bou di guia di Jo Coffie (Jo Café Music).

E studiantenan a transformá e klikonan bèrdè den obranan di arte bunita, pues e tabata un desishon difísil pa e huradónan skohe un ganadó final. Huradónan Miles Mercera (Direktor TCB), Favell Maduro (Hefe di Komunikashon OLB), Wietze Koopman (Presidente Fundashon Platforma Kultural), Claris Trinidad (Mènedjer di Komunikashon Selibon) i Edmée Hagedoorn (Representante Caribbean Homes) a evaluá e klikonan pintá riba kreatividat, mensahe prinsipal i kon e kliko ta hala atenshon.

Ultimamente e huradónan a skohe e kliko ku e temanan papagai, ‘plastic wave’ i ‘protect what you love’ pa e tres mihó klikonan, kaminda ‘protect what you love’ a sali komo ganadó final di e Sushi òf Dushi Kliko Challenge. Pronto Selibon lo pone e nuebe klikonan pintá na e ruta turístiko, ya henter komunidat i turistanan por atmirá e klikonan aki pero mas bien ku nan tin mas opshonnan pa depositá nan shushi.

Share This
error: Content is protected !!