Na eventonan di riesgo haltu, QR-code ta nesesario pa bishitantenan for di 12 aña

Kralendijk – For di 15 di novèmber 2021 te ku 15 di yanüari 2022, tin un periodo di prueba ku eventonan kaminda entre 100 i maksimalmente 250 bishitante por ta presente. E eventonan ta posibel tanten ku e situashon relashoná ku corona na Boneiru ta pèrmití esei. Por adaptá e reglanan pa organisashon di evento durante e periodo di prueba. Intenshon di e periodo di prueba ku eventonan di tèst ta pa sak’afó kiko ta funshoná den práktika.

E periodo di prueba ku evento ta un parti importante di e asina yamá normal nobo. Den e normal nobo, komunidat ta bai bèk poko poko pero sigur na un manera seif, adaptá na e bida manera siudadanonan tabatin promé ku corona. Ta importante ku siudadanonan den e normal nobo ta sigui tene nan mes na e reglanan di corona.

Bishitante
Pa algun evento ku un riesgo haltu manera kanta i balia, un QR-code komo prueba di entrada ta nesesario pa tur bishitante for di 12 aña. Bishitantenan kompletamente bakuná mester mustra e QR-code di nan bakunashon. Bishitantenan no bakuná mester hasi un tèst antígeno dentro di 24 ora promé ku e evento di tèst, e resultado mester ta negativo. Tur bishitante mester mustra un dokumento di legitimashon bálido na entrada manera sédula, pasaporte òf reibeweis.

Hendenan ku ke bai un evento i tin keho, mester hasi un tèst di corona na e kaya di tèst i warda resultado den isolashon. Ta bai pa kehonan manera grip, fèrkout, doló di garganta, tosamentu, etc.

Pèrmit
Siudadanonan i organisashonnan ku ke organisá evento pa entre 100 i maksimalmente 250 bishitante, mester pidi un pèrmit online. Nan mester entregá un plan di akshon. Pa e plan di akshon tin un kopia di un plan di ehekushon disponibel na JAZ.

E direktorado di Supervishon i Mantenshon huntu ku e departamentu di Salubridat Públiko ta studia e plan di akshon i ta wak si tin mester di medida adishonal pa e evento. Esei ta diskutí ku e esnan ku hasi e petishon.

Tur evento mester kaba pa mas tardá 00:00. Por spera ku ta dura maksimalmente 14 dia promé ku esun ku hasi e petishon ta tende kua medida adishonal e mester tuma pa motibu di corona pa e evento. E departamentu di Salubridat Públiko i e direktorado di Supervishon i Mantenshon ta habrí pa idea di organisadónan di evento pa den futuro regla e aktividatnan akí mas mihó i/òf mas seif.

Klup di deporte i horeca
Si klupnan di deporte ta spera aktividat ku mas ku 100 mirónes, nan mester entregá pa esaki tambe un plan di akshon na JAZ pa tende kua medida di corona adishonal nan mester tuma. Den stadion por bende solamente bibida alkoholiko no stèrki. Na eventonan di deporte, organisadónan no mester tene nan mes mas na e 50% di kapasidat pa públiko.

Establesimentunan di horeca mester pidi pèrmit pa aktividatnan ku baile online i entregá un plan di akshon si e aktividat ta pa mas ku 100 bishitante. Esaki ta konta tambe pa establesimentunan di horeca unda awor kaba ta balia parti pafó ku mas ku 100 persona. No ta pèrmití pa baila parti paden na establesimentunan di horeca.

Bo ta kompletamente bakuná i bo ke pidi e QR-code? Yama e ora ei 0800 0900 pa pidi esaki. Wak pa bo tin bo prueba di bakunashon, pasaporte i sédula na man. Bo mester di eseinan ora ta hasi e petishon. Ora hasi e petishon, bo ta tende ki dia bo por buska e QR-code na Kompleho Deportivo Jorge Nicolaas.

Share This
error: Content is protected !!