Kralendijk – Gobiernu di entidat públiko di Boneiru, pa medio di Departamentu di Edukashon i Bienestar ta lansa kampaña 2022 den kuadro di derecho di mucha.

Tur aña dia 20 novèmber ta selebrá dia internashonal di derecho di mucha. Pa e aña aki Departamentu di Edukashon i Bienestar di direktorado Komunidat i Kuido ta lansa un kampaña pa buta énfasis riba 3 derecho ku nos muchanan tin i ku nos ta haña tambe ta importante pa komunidat Boneirano sa i tene kuenta ku n’e.

E derechonan aki ta ankrá den Konvenshon di UNICEF pa Derecho di Mucha bou di e siguiente artíkulonan:

  • Artíkulo 18 ku ta duna e mucha derecho riba un bon edukashon
  • Artíkulo 28 ku ta duna e mucha derecho riba enseñansa
  • Artíkulo 29 ku ta splika kiko e mucha mester siña na skol pa por sigui desaroyá den bida

Ku e kampaña aki nos kier bai konsientisá tur esnan responsabel pa sòru pa kumpli ku e 3 derechonan  aki ku nos mucha nan tin pa mayan nos tin hóben I adulto nan respetabel, responsabel i adekuá pa sigui karga nos isla den tur kategoria.

P’esei riba djaluna dia 22 di novèmber 2021 ta lansa e kampaña ku e lema :

“ Di akohida di mucha na kaminda pa un mihó desaroyo i edukashon.”

Ku e kampaña aki nos lo bai hasi diferente aktividat, tantu pa akohida di muchanan, mayor i/òf tutor nan i skolnan.

Aktividatnan ku lo bai wòrdu organisá den e kampaña ta pa buta énfasis:

Dikon ta importante pa e mucha bishita un akohida di mucha

Dikon ta importante pa inskribí un yu na skol na tempu

Dikon ta importante pa sòru pa e mucha bishita su skol regularmente.

Aktividatnan pa splika mayornan:

Unda nan por akudí pa yudansa riba e partinan aki.

Kiko nan mester tene kuenta ku n’e.

Kon pa den nan bida sosial sigui duna guia i plania aktividatnan pa desaroyá e mucha su talentonan.

Departamentu di Edukashon i Bienestar di direktorado Komunidat i Kuido ta spera ku e kampaña aki nos por dal un stap mas dilanti na yuda krea i forma muchanan, hóbennan, mayornan i adultonan responsabel mayan den nos komunidat.

Pa terminá mi kier pidi tur habitante di Boneiru pa nos ban uni i purba krea e oportunidat pa e mucha por lanta i disfrutá di e derechonan riba un bon desaroyo i edukashon en general.

 

 

Share This
error: Content is protected !!