E Barku di Marina Hulandes Zr.Ms. Holland riba e anochi di 31 di òktober a interseptá un transporte di droga riba Laman Karibe. Djis un ratu despues mes ora a sigui un di dos kaptura. Ámbos biaha e droganan a keda interseptá pa medio di obligá un asina yamá  go-fast pa stòp. E dos kapturanan di droga a keda hasí konosí awe numa.

Despues di detekshon di e go-fast e barku di Marina a lansa su dos botonan rápido, e asina yamá FRISC, ku a sabi di stòp e botonan ku droga. Na momentu ku e kontrabandistanan a nota e botonan di intersepshon, nan a purba di tira e paketenan ku droga den laman. Un parti di esaki ainda por a keda saká for di den laman, miéntras e otro parti a bai pèrdí den laman.

Una bes ku a yega serka di e boto ku droga, ya no por a haña mas droga a bordo, pero si a detené tres sospechoso (un Venezolano i dos Dominikano). Un total di 265 kg a keda interseptá. E sospechosonan i e droga despues a keda entregá na un barku di Wardakosta Merikano.

Ripitishon di movementu

Un dia despues di e kaptura aki, Zr.Ms. Holland ku e helikòpter Marítimo di guera NH90 un biaha mas a topa otro go fast na kaminda. E pasaheronan di e go fast aki tambe a kuminsá benta e merkansianan for di den e boto den laman. Zr.Ms. Holland a aserka e go-fast  ku su dos botonan FRISC, kual tabatin a bordo un ekipo kombiná di Wardakosta Merikano i Kuerpo di Marina. E ekipo di Wardakosta Merikano a detené e pasaheronan di e go-fast. Na bordo a bin topa ku nuebe pakete di kokaina. Nan tabatin un volúmen di mas o ménos 270 kilogram. E sospechosonan aki tambe, ademas di e kontrabanda, despues a keda entregá na Wardakosta Merikano pa persiguishon na Estádos Unídos di Merka. 

Zr.Ms. Holland desde mei ta aktivo den region. E barku ta keda desplegá entre otro pa operashonnan kontra droga i ora di yudansa humanitario. Banda di esei tambe e ta keda desplegá pa diferente tareanan di Wardakosta den region Karibe. Tal manera detekshon di peska ilegal, delitonan ambiental i despliegue durante búskeda i reskate.

Mantenshon di órden hurídiko internashonal ta un di e debernan konstitushonal di Defensa.

Share This
error: Content is protected !!