Awe djaluna 22 di novèmber 2021, Algemene Federatie van Bonairiaanse Werknemers ta kumpli 55 aña di eksistensia.
Direktiva di AFBW kier a yama un danki na tur su miembronan, ku awe AFBW por a kumpli 55 aña i di un manera sólido i fuerte. AFBW ta e promé federashon sindikal di Boneiru i ta e sindikato di mas grandi, na Boneiru.

AFBW a lanta dia 22 novèmber 1966, e federashon aki tabata tin su periodonan di gloria i tambe periodonan ménos bon, pero awe despues di 55 aña, e ta den su gloria atrobe.
Direktiva aktual ta kere ku AFBW por kumpli hopi 55 aña mas di eksistensia, e organisashon aki mester sigui wòrdu manehá pa un direktiva ku ta duna servisio i sigui traha na benefisio di e klase trahadó.
Importante pa un organisashon manera AFBW, ta enserá ku bo mester tin un direktiva ku kurason pa e organisashon i ku ta wòrdu sostené pa su shopsteward nan i e miembronan di e sindikato.
Un bon maneho ta e yabi pa éksito di un organisashon.

Mester sigui uni i karga e organisashon i traha tur dia pa keda mantené esaki i no laga e organisashon aki bai pèrdí, no por laga un patrimonio sindikal Boneriano bai pèrdí, mester konserva e organisashon aki, un organisashon ku un trayektoria largu i ku hopi historia sindikal. “ Den Union tin Forsa”
AFBW ta siguí hiba e lucha pa hustisia sosial, AFBW tin hopi reto pa atendé kuné, tur dia di nobo tin abuzo laboral ta sosodé. Tin un miedu den e klase trahadó, trahadónan ta wòrdu manipulá i abuzá.
Trapamentu di derecho di e trahadó ta sosodé tur dia di nobo i e trahadó tin miedu di denunsia esakinan, pa no haña represaya i pèrdè su trabou, tristu den aña 2021 ainda nos ta biba esenanan di aña 30 di mei 1969.
Tin biaha tin ku buska derecho di e trahadó asta den korte. E lucha di 30 mei 1969, ainda ta leu for di kaba i tin biaha e ta mustra asta ku nos ta bayendo bek den époka aki.
Miembronan di AFBW i e pueblo laboral kòrda riba bo debernan i tambe para pa bo derechonan.
Sindikato ta miembronan i miembronan ta sindikato.
Awe AFBW ta lansa su “fundraising” den forma di un lòt di outo i djasabra dia 27 novèmber AFBW lo bai tin un tremendo B.B.Q pa tur su miembronan, estilo “Walk – Thru”.
Pabien na abo ku ta miembro di  AFBW.

Share This
error: Content is protected !!