Pa bo informashon, aña 1966 pa 2021, awe 22 di novèmber 2021, 55 aniversario di e promé federashon Boneriano ku ta AFBW. Na aña 1966 Sr. Ewald Ong -A- Kwie (R.I.P), mehor konosí pa su nòmber di kariño, Waldi tabata ku vakashon na Boneiru, durante su vakashon na Boneiru, kompañero Waldi a duna su kontribushon i ku a pone e base pa sindikalismo na Boneiru. Waldi tabata un di e ko – fundador huntu ku algun trahadó di OGEM, Cambes, Trans World Radio, Radio Nederland i Shafer nan di Dòmtrùk. Handels Maatschappij Bonaire tabata konsistí di e siguiente empresanan, entre otro Aeropuerto, shipping, waf, supermerkado i garashi FORD, L.D. Gerhards (R.I.P) tabata doño.
Pa por a funda AFBW tabata tin mester di mínimo 25 trahadó, ku nan firma nan boluntario pa por a haña aprobashon di e statuto di AFBW.
AFBW riba fecha 22 novèmber 1966 a haña aprobashon dor di gobernador di Antia Hulandes.

E direktiva temporal di AFBW a wòrdu forma i tabata konsistí di e sinku siguiente trahadónan;
hermano Ewald Abdul ku apénas 25 aña di edat a wòrdu nombra komo presidente. Hermano Diego Grestiaan a wòrdu nombra komo sekretario general (R.I.P.). Hermano Rudolf Statie, Tesorero. Hermano Johanus Janga, komisario (R.I.P) i Augusto Flores, Komisario (R.I.P).
Kompañero Waldi ku tabata presidente di C.F.W. a deklará despues di nos nombramentu ku AFBW lo haña tur sosten tékniko i finansieramente for di su sindikato ku e ta presidente ku ta C.F.W plùs P.W.F.C i U.W.G.E.
Tambe e la deklará ku su persona i e kompañero Regie Venloo lo bira e konseheronan di AFBW na momentu ku negoshashon nan di kombenio laboral C.A.O lo mester wòrdu negoshá na Boneiru.
E direktiva temporal aki despues di 2 aña lo mester wòrdu reeligí dor di e kongreso statutario, manera statutonan di AFBW ta preskribí. Durante kongreso statutario kada 2 aña nos lo haña aporte di tesorero di C.F.W. ku ta hermano Janchi Ilario (R.I.P). kual tabata enkargá ku kontròl di entrada i gastunan finansiero di AFBW.
Pa loke ta edukashon i formashon sindikal nos lo haña koperashon di hermano Henk van Siegem i Estario Chittik.
Presidente di AFBW a sigui un estudio sindikal na Hulanda bou di maneho di sentral N.V.V di kual Sr.  Andre Kloos tabata presidente. E estudio sindikal tabata enserá kiko un sindikato ta enserá, tarea di miembronan di direktiva i alabes un representante di trahadó den un kompania (shopsteward).

 

 

Na aña 1967 AFBW a firma e promé kombenio laboral (CAO) na Boneiru ku Handel Maatschappij Bonaire N.V.  Sr. L.D Gerhards (R.I.P) a duna e ehèmpel di un doño di trabou di buena fe, ku ta tene kuenta ku deber i derecho laboral di e klase trahadó den su empresa. Den e kombenio laboral aki trahadónan a konstatá mehorashon di salario i kondishon nan sosial.  Alabes despues di e firmamentu nos a bin haña tambe un edifisio situá na entrada di kaya Nort Nikiboko, ku ántes tabata edifisio òf kas di fraternan, esei tabata e edifisio ku despues a bin bira nos promé “Casa sindical”. Miembronan di AFBW a keda masha gradesido ku donashon di e edifisio aki dor di L.D. Gerhards (R.I.P).
Durante ku mi persona tabata traha na OGEM no tabata eksistí un CAO, trahadónan di OGEM a reklamá, kon por ta posibel ku mi ta presidente di AFBW anto ta firma CAO na Handel Maatschappij Bonaire n.v. i kaminda trahadónan di OGEM mes no tin un CAO ainda. Despues di un splikashon na Trahadónan, ku ta OGEM ta na bùrt pa nan promé kontrato kolektivo (CAO),  debí ku ta solamente un salario pa siman tabata eksistí, di kual ami tabata tin 0.65 sèn pa ora. Orarionan di trabou tabata 45 ora pa siman di djaluna pa djabièrnè, 8 ora pa dia i djasabra 5 ora. Despues ku AFBW a bin firma un kombenio laboral (CAO) na OGEM a bin un mehorashon di salario i kondishon nan sosial. Tambe den e kombenio laboral di OGEM a introdusí un “kinderbijslag” pa 3 yu i tambe a introdusí tantu “Kilo Watt Uur” pòrnada pa e trahadó.
Despues ku e kombenio laboral (CAO) a drenta na vigor na OGEM, e trahadó mes por a plania su dia ku e ta bai ku vakashon. Promé ku e CAO tabata doño di trabou tabata disidí ki dia e trahadó por a bai ku vakashon. Despues tambe otro kompanianan a yega na  nan CAO.

Segun mi persona konsekuensia di trinta di mei 1969 ta ku sindikatonan, a manda un mensahe pa e doño nan di trabou, pa respetá i rekonosé representante nan di e klase trahadó, despues di e lucha i disturbionan alabes un kambio di gobièrnu sentral a introdusí entre otro;

  1. Lei retiro komo protekshon di e trahadó en general, debí ku dunadó di trabou tabata hasi i deshasí.
  2. Lei di sueldo mínimo ku a wòrdu stipulá pa trahadó di 21 aña di edat. Esaki tabata e mínimo ku un dunadó di trabou por a paga e trahadó, komo protekshon di e klase trahadó.

Na aña 1968 mi ta kòrda e promé kongreso statutario di AFBW a tuma lugá, den Jeugd Huis Jong Bonaire  na Playa, kaminda mi persona a wòrdu re eligí, 1968 – 1971.

Mishon ekonómiko aña 1970.

Riba fecha 23 di òktober te ku 13 di novèmber 1970, un mishon ekonómiko a bai Hulanda, pa duna informashon, ekstenso riba potensial ku Antia Hulandes tin pa ofresé invershonista nan.
Ku respaldo di gobièrnu sentral, gobièrnu insular, sektor industrial i komersial di Aruba, Kòrsou i Boneiru a forma parti di e mishon aki. E mishon ekonómiko tabata konsistí di 4 komishon;
Komishon finansiero ekonómiko
Komishon aspektonan sosial
Komishon industrial i komersial
Komishon “voorlichting i public relation”.

E komishon aspekto nan sosial tabata konsistí; Sr. G.A. Christ, Presidente di Algemene Bond van Ambtenaren Aruba. Sr. J.R. Hart, Presidente Hotel Worker Union Aruba. Sr. H.A. Rojer Presidente di Curacao Christelijke Vakverbond. Sr. G.B. Jones, Presidente Nederlands Antillaanse Bond van Luchtvaart Personeel. Sr. E.G. Abdul, Presidente Algemene Federatie van Boneriaanse Werknemers.

Durante nos enkargo di mishon a deliberá, entre kambia di opinion tokante e problemanan laboral i sosial i sindikal ku e studiante nan antiano biba  nan Hulanda.

Share This
error: Content is protected !!