Awe 22 di novèmber 2021, e sindikato AFBW ta kumpli 55 aña di eksistensia. Un logro signifikante pa e klase trahadó aki na Boneiru, Ku ayudo di sindikalismo di Kòrsou, entre otro di CFW i PWFC a logra pa lanta un sindikato aki na Boneiru 55 aña pasá pa sali na defensa i interes di trahadónan den tur sektor aki riba nos isla. 55 aña despues e sindikato ta un organisashon fuerte ku a konosé bon i ménos bon tempu, pero ku por a konta ku lidernan sindikal di taye. Pa no lubidá ningun, nos ta limitá nos mes awe na menshoná e presidentenan ku a guia e organisashon aki for di su lantamentu te ku dia di awe. Ewald Abdul tabata e ko-fundador i e promé presidente ku a guia e organisashon na dos okashon, esta di 1966 te ku 1971 i despues di 1975 te ku 1979. Te awe kompañero Ewald ta gosa di un bon salú i ketu bai ta duna tur su konosementu i eksperensha na e aktual direktiva di AFBW. Humphrey Wout tabata presidente di e AFWB den e temporada di 1971 pa 1975. Tabata defuntu Juan Jacobs ku a tuma e batuta di 1979 te ku 1997 pa a guia e sindikato pa asina garantisá un organisashon fuerte pa sali na defensa i interes di e trahadónan. Kompañero Nilco Rollan a promové di shopsteward pa a tuma e tarea noble aki na 1997 i a karga esaki te ku 2019 kaminda den un forma repentino ela bin fayesé. Despues di fayesimentu di kompañero Rollan, AFBW a konosé su temporada di mas malu, ora ku den plena negosashon ku Fundashon Mariadal, e último aki a disidí di den un forma aprupto di para retenshon di kontribushon di tur miembronan di e sindikato ku tabata laborá na e Fundashon. Esaki a krea un krisis finansiero, pero tambe tabatin komo konsekuensia ku e sindikato den un tiro a pèrdè kasi 400 miembro ku no tabata paga na kontribushon, ya ku e desishon di Fundashon a kue tur hende di sorpresa. Aki USIBO despues di a hiba un kònbersashon profundo ku kompañero Cherel Kwidama i presentá esaki na e direktiva di AFBW, sr. Kwidama a bin tuma aden pa bai e reto aki i a reorganisá e sindikato ku hopi éksito, rekuperando tur e 400 miembronan i mas di Fundashon Mariadal.  A renobá e statutonan di e sindikato, a pone e Cas Sindikal funshoná komo Cas Sindikal i a krea e espasio pa den e Cas Sindikal por tuma lugá formashon di trahadónan en general. Tambe Sr. Kwidama a logra pone un direktiva fuerte, sostené pa delegadonan di e kompanianan Cargill, BWM, Fundashon Mariadal, Bonaireaanse Wegenbouw i Fundashon Cas Boneriano pa a sigui guia e sindikato ku partisipashon di e trahadó mas efektivo i real posibel. Tabata e trabou visibel aki na interes di e klase trahadó ku a kondusí ku dos kompaniana mas a bin afiliá na AFBW, kualnan ta Bon Lab i ultimamente Selibon. Un punto positivo ta tambe ku e Cas Sindikal a krea espasio pa kompañeronan sindikal por a pone nan ofisina den e kas i asina brinda nan miembronan e servision sindikal ku nan meresé. Bònt di Polis i Straf i tambe USIBO a hasi uso di e oferta aki i tin nan ofisina den Cas Sindikal. Awe e konmemorashon di 55 aña AFBW ta bai tin un toke speshal ora ku e direktiva nobo aki ku a sinta 22 di novèmber 2019 bou di presidensia di Cherel Kwidama lo firma un CAO nobo ku Fundashon Cas Boneriano, Esaki ta e promé CAO ku e direktiva aktual lo firma, miéntras ku tin negosashonnan andando i ku lo kuminsá ku diferente otro kompanianan na unda AFBW ta representá. Di mi parti un pabien di kurason na direktiva, shopstewardnan i tur miembro di AFBW ku nan 55 aña di eksistentia i ku seguramente bou di presidensia di kompañero Cherel Kwidama a enfatisá ku AFBW t’ei pa keda. Un sindikato pará riba su propio pia i ku trabou duru a demonstrá di ta un ehèmpel pa otro kolega sindikatonan ku su meta ta pa sirbi interes di e klase trahadó i ku esei ta gana e konfiansa tambe di trahadónan den tur sektor pa nan afiliá na un sindikato. NOS POR BASTA NOS KE. Ku esfuerso di tur ku ta pone nan mes disponibel pa e trabou aki, sindikalismo na Boneiru lo gana rèspèt i rekonosimentu di henter komunidat. E kunuku sindikal ta grandi, ta trahadó mester pa planta e kunuku i kosechá fruta ku lo mehorá kondishonnan di trabou i kalidat di bida di e klase trahadó i su famia. Sindikalismo na Boneiru mester di kabai di trabou ku ta lucha pa hustisia sosial i no kabainan ku ta djoin pa poder,  fama i gloria personal.

Share This
error: Content is protected !!