Kralendijk, 22 di novèmber 2021. Un biaha mas Fundashon Mariadal ta supliká bishitantenan pa no bin hòspital i e poliklínikanan si nan tin síntoma di COVID-19.

 

Si bo tin keho ku por mustra riba kontagio ku COVID-19, no bin hòspital òf poli e ora ei. Keda kas, aunke bo tin un sita. Tuma kontakto via telefòn +5997158900 i traha un sita nobo òf konsultá si den bo kaso tin otro solushon. Tuma kontakto tambe ku Entidat Públiko Boneiru na number di telefòn 0800 0800 pa traha un sita pa hasi tèst.

 

Ora ku bo ta bishitá un poliklínika, preferibelmente bin e ora ei sin akompañante òf ku solamente un akompañante. Den hòspital tene semper un distansia di 1,5 meter for di otronan. Asina bo no ta protehá bo so, pero nos empleadonan den kuido tambe.

 

Banda di esei den hòspital mester kumpli estriktamente ku e reglanan di prevenshon. Pa dia tin dos momentu di bishita, esta di 11:30 or te 13:00 or i di 18:30 or te 20:00 or. Pa kada pashènt ta pèrmití solamente un (1) bishitante pa dia. Esaki ta konta tambe pa bishita pa kamber di parto i Kas di Kuido. Bishitantenan, klientenan i pashèntnan mester tene kuenta ku uso di un tapaboka médiko ta obligatorio den hòspital i den botika. No ta pèrmití tapaboka di paña. Na entrada di hòspital ta skrin bishitantenan.

 

Mariadal ta konta ku komprenshon i koperashon di tur hende.

Share This
error: Content is protected !!