Kralendijk, 30 di novèmber 2021. Konsehal Daisy Coffie di Frakshon Coffie no ta niun tiki kontentu so ku e rumbo ku Boneiru su gobernashon ta bayendo. DaisyCoffie: ‘Ta birando di mas. Mal gobernashon ta na órden di dia. Awor e chèri riba e bolo ta ku nos propio gobièrnu ta mina outoridat di su empleadonan públiko ku gobièrnu mes a enkargá ku e tarea di mantenshon i supervishon di nos lei- i reglanan. Ta trata di lei- i reglanan ku nos mes a traha pa asina nos tin un komunidat na òrdu di manera ku nos no ta konbertí Boneiru den un repúblika di banana kaminda ken ku ke ta, ta hasi kiko ku ta, kon ku ta i ta sali ileso pasobra e ta gosa di protekshon di nos mandatarionan ku gezaghèber na kabes. I netamente gezaghèber ta esun ku a huramentá  di pèrkurá  pa kumpli ku nos leinan i pa kolmo gezaghèber ta esun tambe ku tin e tarea di vigilá kumplimentu ku prinsipionan di bon gobernashon.  E aktitut aki visiblemente tin komunidat iritá, di manera ku den tur sektor bo ta skucha kehamentu i ekspreshonnan fuerte di desaprobashon.’

No tin konfiansa mas

Segun konsehalCoffie mas i mas komunidat ta pèrdiendo konfiansa den e gobernashon pa motibu ku gobièrnu mes  ta kreando káos.‘No tin rèspèt pa otro. Ta parse ku esnan ku kapital mag hasi loke nan ke. Nos hendenan ta sinti nan deskriminá i ta eksperensiá diariamente ku nan ta estranhero riba nan propio isla.E kaso di Chogogo Resort kaminda lo ta aplikando un maneho di toleransia despues ku gezaghèber i un diputado lo a duna instrukshon pa esaki a i ta lanta hopi stòf. Na unda integridat den gobernashon a keda. E desishon aki ta legal? Si e ta legal, riba kua lei e ta basá? E ta kargá pa henter Kolegio Ehekutivo òf ta kestion di un egotrep pa gobièrnu no kai tin atrobe, loke ta bolbe tapa e violashon fragante aki?’, asina DaisyCoffie ta puntra su mes.

Kuenta i rason

Tur esaki ta motibu ku e konsehal ta haña ku mester bin un reunion públiko di Konseho Insular ku karakter di urgensia pa Kolegio Ehekutivo bin splika i duna kuenta i rason di e manera di proseder deskribí akí riba. ‘Komo representantenan di pueblo nos no por sinta man krusá i mira e debakel akí sigui eskalá’, segun DaisyCoffie di Frakshon Coffie.

 

Share This
error: Content is protected !!