Kralendijk–Dutch Caribbean Nature Alliance (DCNA) su di dos reunion di direktiva pa 2021 a tuma lugá durante nan konvenshon resien na Kòrsou. Su Ekselensianan, gobernadó Holiday di St. Maarten, gobernadó Boekhoudt di Aruba i sr. Jaime Saleh, patrono di DCNA, tabata presente komo opservadó di diskushonnan krusial tokante maneho i DCNA su vishon stratégiko pa futuro.

Vishon stratégiko
Despues di diessinku aña di eksistensia DCNA ta disponé di e instrumentonan nesesario pa yuda hasi su organisashonnan miembro resistí retonan na kaminda. E sosten inmediato, debí na COVID-19, na e parkenan ta keda esensial, pero DCNA mester enfoká tambe riba kambio di klima, un menasa kontra humanidat su eksistensia i kontra bida i medionan pa sobrebibí di e komunidatnan den Karibe Ulandes. Direktor di DCNA, Tadzio Bervoets, a indiká ku “ta krusial pa hisa e nivel di resistensia di nos organisashonnan pa maneho di áreanan protehá, pa nan por resistí vários shòk eksterno na kaminda, komo konsekuensia di e krísis klimatológiko ku nos ta bibando. Un otro meta stratégiko di DCNA ta pa konsehá nos gobièrnunan lokal di forma mas efektivo, teniendo na kuenta ku nan ta un grupo di interes importante.”

Bon maneho
Pa por sirbi e organisashonnan miembro mihó, DCNA ta bai kuminsá operá den un struktura di maneho ku konosé dos nivel. Esaki lo permití maneho diario di e organisashon atendé tareanan ku ta rutina, miéntras ku direktiva por enkargá ku toma di desishon pa largu plaso i planiashon stratégiko. Durante e reunion di direktiva a trata tur e aspektonan regular di bon maneho, manera aprobashon di presupuesto pa aña 2022 i aprobashon di e relato finansiero pa aña 2021. Mas aleu e reunion a brinda oportunidat na sekretariado di DCNA i e organisashonnan miembro pa amplia riba aktividatnan ku a tuma lugá despues di e último reunion di direktiva ku a tuma lugá na aprel.

Na kaminda pa 2030
Direktiva a yega na un akuerdo pa loke ta trata e plan stratégiko pa e periodo 2021-2030. E plan aki ta konsiderá tantu e retonan komun di e organisashonnann pa konservashon di naturalesa, komo e nesesidatnan spesífiko di kada isla. Krea konsientisashon tokante e desaroyonan aki ta un aspekto importante di DCNA su metanan. “Nos ta den e fase final pa kontratá un kolaboradó di informashon i relashon públiko pa mehorá nos propio kapasidat pa komuniká i pa yuda e parkenan mehorá esun di nan pa komuniká ku nan respektivo komunidatnan tambe”, Bervoets a indiká.

Pa mas informashon tokante e reunion di direktiva di DCNA por bishitá página di Facebook di DCNA: DutchCaribbeanNatureAlliance

Share This
error: Content is protected !!