Kralendijk – Den e siman akí en total en total 90 hende di 70 aña bai ariba a pasa angua di buster na Rincon.  Esaki a tumá lugá djárason 1 di desèmber na Cocari i na e konsulta bieu di dr Castro. E hendenan di 70 aña bai ariba ku a pasa angua ta entre otro klientenan di Pasadia i Kas Cocari. Departamento di Salubridat Públiko a haña pèrmit di famia di e klientenan di Cocari pa pasa nan angua.

E empleadonan di kuido di Cocari i habitantenan di bario di 70 aña òf mas grandi tambe a pasa angua di buster. Na e konsulta bieu di e dòkternan di kas Castro e habitantenan di bario ku no ta biba na Cocari a pasa angua. Durante e último dianan e dòkter penshoná Selly Pourier a aserká un parti di nan personalmente pa pasa angua di buster. Dòkter Pourier mes ta prosedente di Rincon i e ta biba den e bario akí tambe.

,,Ora ku mi sali for di mi kas i subi kaya, ya kaba mi ta konta alrededor di 12 habitante di 80 aña bai ariba. Mi a aserká e habitantenan di bario personalmente. Bo no sa nunka si nan a tende via radio òf lesa den korant ku ta posibel pa pasa angua di buster den bario. Mi ta satisfecho, nan a puntra si departamento di Salubridat Públiko por ofresé angua di buster un biaha mas den bario.” asina e dòkter ta splika.

Riba djárason 8 di desèmber 2021 tin posibilidat atrobe pa tur habitante di bario di 60 aña bai ariba di Rincon pasa angua di buster. Habitantenan di bario di 60 aña òf mas grandi por pasa  angua di 13:30 te 16:00 or na e konsulta bieu di e dòkternan di kas Castro na Kaya E.B. Sint Jago 7.

Share This
error: Content is protected !!