Kralendijk – Frakshon Demokrat ta ekspresá disgusto i desaprobashon kompleto pa ku e trato preferensial, kontra lei i regla, ku Kolegio Ehekutivo ta duna Chogogo Beach & Resort den e proseso pa e resòrt haña e pèrmit ambiental ku nan falta pa traha un bich artifisial i habri nan portanan. Na mes momentu e Kolegio ta ofresé kondishonnan limitá na un empresario lokal pa bende pastechi riba Malekon.

Na komienso di oktober último e Direktorado di Supervishon i Mantenshon di Lei den koperashon ku Stinapa a para konstrukson di e bich artifisial na Chogogo Beach & Resort i a duna nan un but pa motibu ku a konstatá ku e resòrt no tabatá disponé di e pèrmit ambiental nesesario pa por basha santu artifisial pa traha e bich. E pèrmit ta pa garantisá ku e santu no ta kousa daño na e koralnan. Apesar di e òrdu pa stòp, e propietario a sigui ku e trabounan manera nada no a pasa, mustrando di e manera aki ku e NO ta respetá nos naturalesa ni e lei i regla vigente pa protehá esaki. Frakshon Demokrat tin asta entendí ku e propietario a menasá e ambtenar di e direktorado pa e echo ku a para e trabounan. Kiko lo mester pasa ku e propietario ku a hasi e menasa aki, Frakshon Demokrat ta puntra. Despues di esaki gezaghèber a bai sinta na mesa ku e propietario pa yega na un ‘solushon’ pa ku e situashon.

Ta inaseptabel pa Frakshon Demokrat ku Gezaghèber, despues di e reunion ku Chogogo Beach & Resort, a sigui mete su mes ku e asuntu aki i a duna òrdu na Stinapa i ambtenarnan di e direktorado ariba menshoná pa no para e konstrukshon i no duna e but, pues pa no kumpli ku e lei i regla vigente. Por a lesa tambe den medio di komunikashon ku gezaghèber, na nòmber di Kolegio Ehekutivo, a ordená e Direktorado di Planifikashon i Desaroyo oralmente pa sòru pa duna e resòrt e pèrmit ambiental mas rápido ku ta posibel pa asina nan por a habri promé di desèmber último. Komo ku e resòrt a entregá e petishon pa e pèrmit 17 di novèmber último, lo tabata imposibel pa nan risibí e pèrmit promé ku 1 di desèmber.

Komo chèri riba e bolo di violashon di lei i regla, Frakshon Demokrat a tuma nota tambe ku Kolegio Ehekutivo posibelmente a duna Chogogo Beach & Resort un dekreto oral di toleransia ku a hasi posibel pa e propietario tòg por a sigui hasi e trabou sin ku nan ta kumpli ku lei i sin ku e palabrashon ta poné riba papel. Pa e frakshon konsientemente Kolegio Ehekutivo ta disidí pa hasi e palabrashon aki skondí pa asina esnan ku tin interes i/òf por tin daño dor di e dekreto, no sa nada i no por entregá un keho kontra di e desaroyo aki tampoko. Frakshon Demokrat: si en realidat Kolegio Ehekutivo ta goberná na bienestar di e pueblo aki, kon por ta ku nan ta hasi kosnan skondí pa asina e komunidat no haña sa?

Frakshon Demokrat ta kondená i ta haña insólito ku Chogogo Beach & Resort no ta kumpli ku lei i regla, i riba dje Gezaghèber, ku tin e tarea prinsipal pa wak si gobernashon ta kumpli ku lei i regla, mes ta pidi su trahadónan pa nan no kumpli ku esaki pa asina faboresé e propietario di e resòrt. E frakshon ta sigui enfatisá ku leinan tei i ta konta pa tur hende. Ta manera ku ta Kolegio Ehekutivo ta disidí pa ken sí i pa ken nò lei ta konta i ku esaki ta dependé di kuantu sèn un hende tin den su saku. Manera a pasa resientemente: un boneriano ta para kantu di awa bende su pastechi (Pastechi & More), un hende ta reklamá i mesora e direktorado di Mantenshon i Supervishon di Lei ta bai kit’é pa e para otro kaminda; aparentemente pasobra e ta un boneriano. Aki banda ta traha un resòrt, e no ta kumpli ku lei i regla, tur hende ta reklamá i Gezaghèber ta duna òrdu pa laga nan sigui traha trankil. E diferensia ku tin ta esun ta un boneriano humilde ku ta traha pa e kome, e otro ta un mionario. Frakshon Demokrat: Nos tin un problema fundamental!

Pa e frakshon e motibu tras di e aktitut di Kolegio Ehekutivo ta kompletamente robes, no ta aseptabel i no ta kuadra ku e liñanan di bon gobernashon. Esaki ta mal maneho ku ta duna a lo menos un muestra di mal intenshon. Frakshon Demokrat en todo kaso lo bai atendé seriamente ku Kolegio Ehekutivo tokante di esaki durante di e reunion di Konseho Insular públiko ku nan a pidi i ku lo tuma lugá djamars awor 7 di desèmber pa 7’or di anochi.

Share This
error: Content is protected !!