Dia 3 di desèmber ROC Mondriaan i Scholengemeenschap Bonaire ta firma un akuerdo di kolaborashon. Den dje nan ta palabrá pa traha estrechamente huntu pa fortifiká enseñansa profeshonal na Boneiru. E firmamentu ta ofisialisá inisio di e laso eskolar despues ku, pa masoménos dos aña kaba, tur dos skol ta interkambiá ekspertisio riba tereno di enseñansa MBO ICT i guia sustansial di stazjèrnan di mbo for di Boneiru den empresa- i institushonnan hulandes. E meta ta pa ekspandé e kolaborashon den direkshon di sektornan di téknika, hospitalidat i servisio empresarial. Komo miembro di e Kolegio di Maneho, Harry de Bruijn ta un di e motornan tras di e laso eskolar: ‘E laso eskolar akí ta bon pa tur dos partido. Nos ta inspirá i reforsá otro ku un meta komun: fortifika enseñansa profeshonal i prepará personal kualifiká na Haaglanden i na Boneiru.’

 

Estudio IT na Boneiru

E aña tras di lomba Skol pa ICT di ROC Mondriaan i MBO Bonaire huntu a traha duru pa stablesé e estudio Sistema & aparato ICT (promé Maneho di sistema) na Boneiru. Entre otro a organisá lokalnan, ta duna lès i tin konsulta online entre dosentenan di e dos skolnan (teach-the-teacher) i a pone un dosente di ROC Mondriaan disponibel na Boneiru. Tin un papel importante pa Cisco Networking Academie, ku tambe ta invertí den kompra di hard – i software i edukashon. Huntu ku Axians nan ta responsabel pa organisá un lokal pa lès na distansia.

 

Kore stazje

Un grupo di studiante di MBO Bonaire ta kore stazje kaba na Hulanda, guiá pa ROC Mondriaan. Ruvinia Gomez ta studiante Trahadó pedagógiko kuido di mucha spesialisá ku na e momentu akí ta kore stazje na Den Haag: ‘Ta mashá fasinante pa studia i traha leu for di kas. Pero e guia ta bon i mi ta siña masha hopi!’

 

Alohamentu i guia/kompañamentu sosial ta den man di Turan Goeloe. Un ke otro a bira posibel ku sosten finansiero di departementu di enseñansa di Boneiru i Ministerio di Enseñansa na Den Haag. Direktor di unidat di MBO Bonaire Liset de Keijzer: ‘Ku e sosten finansiero nos por a entregá e studiantenan ku un kurason trankil na e organisashonnan profeshonal akí. E kolaborashon di durashon largu ku nos ta stablesé awor ku ROC Mondriaan, ta duna nos tremendo oportunidat pa fortifiká enseñansa profeshonal na Boneiru.’

 

Laso eskolar

Den nan laso eskolar ROC Mondriaan i SGB ta bai traha huntu riba hopi tereno. Dor di interkambiá konosementu i eksperensia riba tantu tereno di kontenido komo tereno organisatorio, partidonan ta siña di otro. Ta bai pa interkambio di método i material di lès, pone lès online disponibel, guia stazjèr i kompartí konosementu relashoná ku sistema di mónitòr studiante (leerlingvolgsystemen).

 

MBO Bonaire komo parti di SGB, ta un komunidat di skol amplio ku mas ku 2000 alumno i studiante, ku ta ofresé enseñansa den mas ku 30 estudio. Na Haaglanden ROC Mondriaan ta ofresé alrededor di 240 estudio mbo na masoménos 20.000 studiante i ta fasilitá enseñansa i edukashon na un 5000 adulto asina. ROC Mondriaan ta organisá enseñansa na eskala chikí na 26 skol.

Share This
error: Content is protected !!