Kralendijk – Durante e periodo tras di lomba den un sekresia total a hasi grabashon na Boneiru pa final di e programa ‘Het Perfecte Plaatje’ (E Imágen Perfekto). Aktualmente e programa di televishon hulandes akí ta den su di seis temporada i semanalmente e programa sa di hala mas ku 2 mion televidente. Den e programa, 10 hulandes renombrá ta kompetí ku otro den un kompetensia di saka potrèt, bou di guia di presentadó Tijl Beckand i un hurado profeshonal. Entretantu e presentadónan di televishon Patrick Martens, Frits Sissing i e aktris Georgina Verbaan a alkansá e final, ku por mira den dos diferente transmishon for di djárason 15 di desèmber pa 20:30 or na RTL4. A graba ámbos episodio na Boneiru; durante e transmishon di 8 di desèmber nan a revelá na televidentenan hulandes ku e finalistanan den e kompetensia final a kompetí ku otro na Boneiru.

Den  ‘Het Perfecte Plaatje’ e kandidatonan a haña vários tarea ku tin di haber ku fotografia ku nan tin ku hasi rònt di nos isla i kaminda diferente sitio i tópiko ta bini na vigor. Di e manera ei nan a saka potrèt di Boneiru su naturalesa i e eksperensia kulinario di nos isla, pero tambe  deporte akuátiko i nos mundu bou di laman a keda ilustrá atraves di tareanan di fotografia, kaminda e kandidatonan a bai snòrkel na Klein Bonaire i saka potrèt di nos talentonan lokal durante ‘kite surfing’.

‘Pa Boneiru esaki ta un oportunidat fantástiko pa alkansá un públiko di algun mion televidente durante e periodo friu di wenter na Hulanda i pa presentá nos isla na un manera kreativo. Pa medio di sakamentu di potrèt den e programa e televidente hulandes ta haña un bon impreshon di e diferente aktividatnan ku bo por ehersé den nos bunita naturalesa i nos ta spera ku nan ta haña inspirashon tambe pa nan mes bin saka nan potrètnan perfekto na nos isla bou di un dushi solo’, segun Miles Mercera, CEO di Tourism Corporation Bonaire (TCB).

 

E tim di ‘Het Perfecte Plaatje’ a permanesé durante un periodo di 9 dia na nos isla pa por hasi e grabashonnan pa e dos episodionan final. E spònsernan ku a hasi nan estadia na Boneiru posibel ta TCB, hotèl partner Delfins Beach Resort i e kompania aéreo KLM. TCB ta gradisí tur otro partner lokal ku a duna un aporte durante e grabashonnan na Boneiru pa loke ta trata e grabashonnan pa televishon i ku tambe di un otro manera a duna nan koperashon na ‘Het Perfecte Plaatje’.

Por mira e dos episodionan final di e di seis temporada di ‘Het Perfecte Plaatje’ na RTL4, for di 20:30 or ora hulandes riba djárason 15 i 22 di desèmber binidero. Tambe ta posibel pa wak e programa bèk online via rtlxl.nl pa 17:15 or ora lokal riba tur dos fecha. Via e página hulandes di Facebook di TCB, @BonaireToerisme, durante e simannan binidero regularmente ta kompartí aktualisashon tokante e programa.

Share This
error: Content is protected !!