Kralendijk – Ora di investigashon di fuente i kontakto i tèstmentu di hende ku keho, e departamento di Salubridat Públiko ta tene èkstra kuenta awor ku e variante omicron. E departamento ta kere ku dentro di poko ta topa e variante akí ku ta pasa rònt mundu na Boneiru tambe. Meskos ku esei a sosodé den pasado ku e variantenan alfa i dèlta. E pregunta no ta si e variante omicron ta bin Boneiru sino ki dia, asina e departamento ta laga sa.

Personanan aserká pa investigashon di fuente i kontakto, ta haña e pregunta si e último 14 dianan, nan tabata di biahe. Si esei ta e kaso, e ora ei e departamento ta hasi un investigashon ekstenso di fuente i kontakto.

Ora ta traha un sita pa tèst, ta tene kuenta tambe ku e variante omicron. Aki tambe ta puntra hende si nan tabata di biahe último 14 dianan. Ora un hende tabata di biahe, ta manda e resultado di tèst un laboratorio spesial. Esaki ta pa haña sa di kua variante ta trata.

Awor ta mas importante ku hendenan ku keho ta tèst na e kaya di tèst di Salubridat Públiko. I ku siudadanonan no ta usa outotèst (selftest) òf ta bai un laboratorio komersial unda no ta investigá e resultado di tèst pa e variante nobo.

Bo tin keho? Keda kas e ora ei i yama 0800 0800 pa un sita pa tèst.

Share This
error: Content is protected !!