WILLEMSTAD – E estreno di e dokumental tan antisipá di NINA: E historia tras di MAFFIAMEID a tuma lugá djamars ultimo na the Movies, Skalo, ku un antesala ku a marka historia. Diferente dignitario i invitado a kana e ‘red carpet’ di e dokumental, unda Nyorka ‘Nina’ Lindeborg tambe a hasi su entrada rondoná pa su famia i amigunan.
 
 Aki, diferente famia i amistat di Nina a ekspresá nan alegría pa mira e dokumental tan antisipá mira lus di dia. Despues di algún palabranan di gratitut, tur invitado por a pasa pa e sala luhosamente renová di IMAX pa gosá di e promé episodio di e dokumental.
 
Un proseso largu
A traha aproksimadamente 3.5 aña riba e dokumental aki, ku a keda produsí pa e talentoso duo German Gruber Jr. i Justin Kees, i a keda graba na Kòrsou i tambe na varios stat na Hulanda. Partí di e elenko tabatin tres aktris ku a hunga e papel di Nina, banda di e aktornan ku e trese na bida diferente figuranan importante den su bida. Despues di a marka historia ku su outobiografía emoshonante, MAFFIAMEID, ku aktualmente ta den su di ocho imprenta, a kuminsá e proseso pa traha un dokumental di e bida di Nina. Na promé instante Nina tabatin varios opshon na Hulanda, pero al final ela opta pa traha ku CARIFLIX di Kòrsou.  
 
Un atvertensia pa hubentut
Nina ke pa e relato di su bida ta fungí komo un atvertensia serio pa hóbennan no skohe pa e bida di krímen ku finalmente no ta bale la pena. E eksperensianan di Nina ta asina numeroso, ku por skibí un di dos buki di su bida. E dokumental di kuater episodio, ku ta pasa riba CARIFLIX, si ta bai más profundo den e historia. Apesar di un hubentut turbulento i un adultes marka pa prostitushon i wega di droga, ta remarkabel pa mira kon Nina a tuma rienda di su bida despues di a sinta un kastigu di mas di 12 aña.  Awó Nina ta pasa su tempu papiando ku hóbennan den riesgo i mamanan soltero. Tambe e tin diferente otro proyekto emoshonante ku Nina ta trahando riba den futuro serkano. NINA: E historia tras di MAFFIAMEID  ta un obra magistral ku lo hiba bo den un variedat di emoshon i ta duna bo un bista kon bida di hende por tin hopi buelta, pero ku semper tin espasio pa kambio i kresementu.   
Kumpra bo ‘voucher’
Pa sintonisá e kuater episodionan di NINA: E historia tras di MAFFIAMEID bo mester ‘download’ e app di CARIFLIX vía App Store of Google Play, traha un kuenta i kumpra e pakete na rason di 39,90 USD. Of 70 florín antiano ku bo tarjeta di krédito. Tambe bo por kumpra bo ‘voucher’ na TeleCuraçao, Mensings Caminada i 24 Uur Uit De Muur i e otro puntonan di benta konosí riba nos islanan. Bishitá www.facebook.com/Maffiameid of Instagram @maffiameid  pa mas informashon.
Share This
error: Content is protected !!