Kòrsou – Rev. Louise de Bode Olton djabièrnè último a bendishoná e buki nobo pa 2022: ‘Feng Shui pa pas, salú, abundansia i prosperidat den Aña di Tiger di Awa’ skibi pa Feng Shui i Paht Chee Master Reyna Joe.

Feng Shui no ta un religion i ta e filosofia di bida chines ku a originá na India i ku pa siglonan a resultá di un konosementu ku ta duna praktikantenan oportunidat pa krea un bon i mihó bida pa nan mes.

Meskos ku e buki di aña 2021 esun di 2022 ta basá riba kalènder lunar i no kalènder gregoriano ku ta konosí den nos parti di  mundu.

Atrobe e ta konsistí di informashon básiko i general na papiamentu, ku tópikonan interesante pa hende ku ke bai kasa, salú, kon krea bo prosperidat i datonan general pa esnan ku ke familiarisá nan mes ku e konosementu antiguo aki i tambe pa esnan mas vèrsá den e tópiko.

Reyna Joe ta biba Feng Shui for di aña 1997 i e konosementu den e buki ta basá riba lesamentu/estudio/kòmbersashonnan kontinuo ku tur posibel maestro di Feng Shui ku a pasa den su kaminda for di 1997 i despues a sertifiká serka Gran Maestro Lillian Too (Maleisia) kende ta esun ku a popularisá e konosementu di Feng Shui na ingles pa mundu oksidental.

Loke ta hasi e buki aki interesante ta ku banda di informashon riba Feng Shui por us’é komo agènda tantu segun kalènder gregoriano komo kalènder lunar hañando e.o. informashon di ki tipo di energia tin pa kada dia den 2022.

Asina aki tur ku ke sa mas di Feng Shui ta haña e konosementu aki na papiamentu pa plania Aña di Tiger di Awa, ku ta kuminsá dia 1 di febrüari, mihó posibel.

Un danki espesial ta bai pa Sonnaisa Payne ku e aña aki atrobe a hasi gran parti di e trabou pa e buki por ta un realidat.  I riba Feng Shui Kòrsou riba facebook por haña mas informashon.

‘Feng Shui pa pas, salú, abundansia i prosperidat den Aña di Tiger di Awa ’ ta optenibel serka Reyna Joe na fengshuikorsou168@gmail.com òf via 561 2818

Share This
error: Content is protected !!