Riba djárason 15 di desèmber, atardi 5:30 or, Pastor Marc di Parokia Coromoto ta tene un Santo Sakrifisio di Misa na e sitio di Krus den Piedra na Nort di Saliña riba petishon di Fundashon Nawati.

E sitio Krus den Piedra ta un sitio ku e indjannan di Kunuku Bieu tabata konosí komo un sitio di selebrashon i ku despues katólikonan di Nort di Saliña tambe a usa pa tene proseshon i pa tene misa òf lòf. E kustumber akí a disparsé na sierto momentu den historia di e bario. Krus den Piedra ta keda serka di Skol Amplio Papa Cornes tras di e kasnan di FCB na Kaya Pueblo. Ora ku tabata desaroyá e plannan di konstrukshon di e skol fundashon Nawati entre otro a sali na vanguardia di mantenshon intakto di e sitio di Krus den Piedra, pa historia di bario.

Ku e selebrashon di un Santu Sakrifisio di Misa riba 15 di desèmber ku koperashon di Pastor Marc na e sitio, Nawati ke rebibá e kustumber katóliko di tene selebrashon religioso na Krus den Piedra. E misa lo ta un misa kòrtiku i tin ku tene kuenta ku esaki ta tuma lugá den naturalesa puru di bario i lo mester bini ku stul òf banki sólido ku por usa riba tereno di kunuku. Nawati ta invitá norteñonan deboto pa bin tuma parti na e Santu Sakrifisio di Misa bou di mantenshon di e medidanan di Covid 19. Teniendo kuenta ku e situashon primitivo na Krus den Piedra i ku den e temporada akí ta bira skur tempran e selebrashon lo unu kòrtiku.

Por alkansá Krus den Piedra na altura di e krusada di Kaya Pueblo ku Kaya Oneida, pegá ku e konstrukshon ku ta tuma lugá patras di iglesia Kas di Dios. Akí mester sigui i drenta e tereno di stashoná outo pa maestronan di e skol Amplio Papa Cornes. Aki ta haña e entrada pa yega na e sitio Krus den Piedra. Nos ta spera boso pa por kuminsá na tempu.

Share This
error: Content is protected !!