KRALENIJK – Direktiva di Union di Penshonadonan pa Adelanto i Hustisia Boneiru (UPAH) huntu ku su Komishon di Aktividat (KOMAK) ta partisipá ku pa motibu di e situashon di Covid-19 riba nos isla i teniendo kuenta ku e medidanan di prekoushon ku gezaghebber a tuma, a kanselá e tradishonal Sena di Pasku pa miembro- i introdusidonan e aña akí. Sinembargo direktiva di UPAH no kier laga e temporada di fiesta akí pasa bai sin mas, sin duna atenshon na nos miembresia. Pa e motibu ei, na lugá di e Sena di Pasku, e aña aki lo regalá tur miembro un atenshon den forma di un pakete di Pasku. E entrega lo bai den forma di un asina yamá ‘Drive Thru’, riba djadumingu, 19 di desèmber.

Orario

Riba e dia menshoná miembronan por pasa ku outo na e lugá di stashoná outo banda di ofisina di UPAH na Kaya Nikiboko Nort pa tuma nan apresio. Esaki ta tuma lugá entre 10or i 12or.

Den oranan di djadumingu atardi, di 03:30or pa 04:30or, miembronan di UPAH ku ta biba na Rincon por tuma nan pakete dilanti di La Tropicana.

Direktiva di UPAH ta pidi tur miembro pa por fabor hasi uso di e oportunidat akí i den kaso ku no por pasa personalmente pa laga un konosí tuma e pakete pa nan na e orario- i sitionan menshoná.

For di awor direktiva di UPAH kier a ekstendé e mihó deseonan di Pasku i Fin di Aña na miembronan i nan famia, gozando di bon salú. Felis Pasku i un Prospero Aña Nobo.

Share This
error: Content is protected !!