Kralendijk – Personanan di 18 aña bai ariba por mèldu for di djaluna 13 di desèmber pa e angua di buster. Via e number gràtis 0800 0900 personanan di 18 aña bai ariba por traha un sita pa pasa angua. E angua di buster ta un angua èkstra ku hende ta haña despues ku promé ku esei nan a pasa dos angua kontra corona.

Ta duna e angua pa hasi e protekshon di e dos anguanan kontra corona mas grandi. Pa pasa e angua di buster, un hende mester a pasa e di dos angua kontra corona por lo ménos seis luna pasá. Un hende ku a haña COVID-19 despues di e di dos angua kontra corona, mester warda por lo ménos seis luna kontá for di e momentu ku el a tèst positivo.

Promé ku un hende pasa e angua di buster, e persona tin ku yena un deklarashon di salú. Hendenan ku tin un sita pa e angua di buster, por yena e deklarashon di salú na e sitio di pasa angua. Por download e deklarashon di salú tambe riba www.boneirukrisis.com. Ora di pasa angua e persona por bai ku e deklarashon di salú ku el a prent.

Riba djárason 15 di desèmber habitantenan di Rincon por pasa e angua di buster sin sita for di 10:00 te 13:00 or na e konsulta bieu di e dòkternan di kas Castro na Kaya E.B. Sint Jago 7. Den luna di desèmber tin dianan èkstra di pasa angua planiá na Kompleho Deportivo Jorge Nicolaas. Esaki ta e bista general pa e oranan di pasa angua for di 13 di desèmber 2021  te ku 18 di desèmber 2021. Tur e dianan akí bo por pasa e di promé  òf di dos angua kontra corona ku i sin sita. Por pasa e angua di buster solamente si bo tin sita, ku eksepshon di djárason 15 di desèmber. E dia ei habitantenan di Rincon por pasa angua di buster sin traha sita.

Djaluna              13 di desèmber              17:30 – 20:30          Kompleho Deportivo Jorge Nicolaas
Djamars             14 di desèmber             17:30 – 20:30          Kompleho Deportivo Jorge Nicolaas
Djárason              15 di desèmber 10:00 – 13:00              Rincon
Djaweps            16 di desèmber 09:00 – 13:00         Kompleho Deportivo Jorge Nicolaas
Djaweps              16 di desèmber             17:30 – 20:30          Kompleho Deportivo Jorge Nicolaas
Djabièrnè                       17 di desèmber 09:00 – 13:00          Kompleho Deportivo Jorge Nicolaas
Djasabra             18 di desèmber             09:00 – 14:00          Kompleho Deportivo Jorge Nicolaas

Bo tin keho? Keda kas i yama 0800 0800 pa un sita pa tèst.

Share This
error: Content is protected !!