ralendijk – Miembronan di Kolegio Ehekutivo un di e dianan akí ta haña e angua di buster. Esaki ta sosodé djaweps 16 di desèmber 2021 di 10:00 – 11:00 na Kompleho Deportivo Jorge Nicolaas.  Periodistanan ku ke presensiá e pasamentu di angua di Kolegio Ehekutivo, tambe por pasa e angua di buster e ora ei si nan ke esaki. E departamento di Salubridat Públiko a organisá e momento di pasamentu di angua pa gobernantenan i periodistanan.

,,Aki na Boneiru meskos ku na otro parti di mundu, nos mester protehá nos mes èkstra kontra e vírùs di corona. Ta konosí ku protekshon di e dos anguanan di corona ta bira ménos despues di un tempu. P’esei ta bon pa pasa e angua di buster. Pa ta protehá mas mihó ainda kontra e vírùs di corona. For di último investigashonnan ta resultá ku posiblemente e angua di buster ta protehá tambe kontra e variantenan nobo di e vírùs di corona, ta sigui investigá esaki,” asina Joey van Slobbe, kordinadó di bakunashon di e departamento di Salubridat Públiko a deklará.

For di djaluna 13 di desèmber 2021 personanan riba 18 aña por registrá via e number 0800 0900 pa traha un sita pa un angua di buster. No ta posibel pa pasa e angua di buster sin sita. E úniko eksepshon riba esaki ta e siman akí pa habitantenan di Rincon. Djárason 15 di desèmber nan por pasa e angua di buster sin sita di 10:00 – 13:00 na e ofisina bieu di dòkternan Castro na Kaya E.B. Sint Jago 7.

Den pasado Salubridat Públiko a organisá seshon di pasa angua tambe den otro bario pa hendenan ku no por bai e sentro di pasa angua na Kompleho Deportivo Jorge Nicolaas fásilmente. Pa luna di desèmber, Salubridat Públiko a pone dia èkstra pa pasa angua pa e promé i di dos angua di corona i e angua di buster. ,,Loke nos ke mira ta ku mas tantu habitante di Boneiru posibel ta drenta e aña nobo bon protehá i kompletamente bakuná. P’esei promé ku aña bòltu nos ta sprent bai rekta final asina mas hende por pasa e angua di buster òf e promé òf di dos angua di corona,” asina Van Slobbe a komentá.

Pa un bista di e dianan èkstra pa pasa angua, bishitá: htps://www.boneirukrisis.com/bakunashon

Share This
error: Content is protected !!