Kralendijk – Tur hende ku ta sigi politika i gobernashon aki na Boneiru, ta na altura ku ta diputado James Kroon ta e titular di entre otro Kamindanan riba nos isla. Si e informashon aki, pa un of otro motibu no a jega na bo konosementu via di medionan sosial, komunikado ofisial di gobiernu of for di e sitio di informashon di entidat publiko Boneiru, bo mester a skucha e tantisimo kehonan ku tur hende a pone riba su lomba. A bati James Kroon, manera ta bati huda, ta pesei mi ta bisa, awor ku James Kroon a logra kambia e direkshon robes den R&O I ku resultadonan a kuminsa bira visibel, ta ora pa para ketu I dune su elogio.

Rotonde no ta kla, kamindanan ta un desaster, nada no ta pasando ku kamindanan, James Kroon mester baha. Tur esakinan tabata slanan ku diputado Kroon mester a soporta. Ningun hende sinembargo no a tene kuenta ku e situashon kaotiko ku Ettiene van der Horst (eks direktor di R&O) a laga. Ettiene van der Horst a pone tur hende kontra otro den e direktorado I a kaba ku produktividat den e departamentu. E situashon aki a pone ku mester a move shelu I tera pa pone ordu bek den e direktorado pa pueblo por kuminsa mira e resultadonan.

Ribae topiko di rotondenan, mi ke hasi un pregunta. Porta tin hende ku por splikami esaki pasobra ami no ta kompronde: E rotonde ku mester a wordu realisa na e krusada di kaminda Amsterdam I Kaminda Djabou, lo a bira e di 5 rotonde ku Boneiru a traha bou di responsabilidat di diputado, James Kroon. Tur e kuaternan ku a bai prome, a keda traha sin problema. Diripiente despues di a traha 4 rotonde, ta resulta ku James Kroon no por traha rotonde mas?. A otro pero con ese hueso!! Ta obvio ku otronan a hasi koi kabesura I no a skucha. Esei te berdat.

Biniendo bek riba e kamindanan, mi mester bisa ku no opstante tur e slanan ku tabata kai, (sla ku lo a pone kualke otro sali kore limpi bai- diputado Kroon a mustra liderasgo I a sigi traha. E la sigi traha pasobra e tabata konvensi ku e por kambia kos I trese e resultado ku pueblo ta warda riba dje. Esaki ta nifika ku e la mira e lus na horizonte prome ku tur otro. Un senjal klave di liderasgo.

Awe, kasi jegando na fin di anja 2021, Pueblo a kuminsa mira e lus ku diputado Kroon a mira. Diputado Kroon a logra hanja grip riba e prosesonan den R&O I a pone ku asfalt a kuminsa lora I tin hopi mas pa bai. Ami ta kere ku ta na su lugar pa awor ku diputado Kroon a kura e herida ku a laga den R&O, ta na su lugar pa dune su elogio awo. Dikon, pasobra e merese. Ora di golpia, no tabata falta palu…. Pues awor ta ora pa elogia.

Bon trabou! I falta mas.

Share This
error: Content is protected !!