Kralendijk- Fondo di Penshun Hulanda Karibense (PCN) (Pensioenfonds Caribisch Nederland) entrante 1 di yanüari 2022 ta indeksá e penshunnan ku 4%. Esaki ta kompletamente di akuerdo
ku e inflashon di preis promedio na Saba, Boneiru i St. Eustatius. Direktiva a tuma e desishon akí den e reunion di direktiva di novèmber. E Hunta di Supervishon a bai di akuerdo ku esaki i e Organo di Konseho i Responsabilisashon a duna un konseho positivo. Den 2022 e prima ta keda igual na e nivel di e último añanan i ta suma 22% di e salario ku ta generá penshun. E kapasidat pa indeksá total ta danki na e bon posishon finansiero di e fondo. E splikashon di esaki ta sintá den dos faktor. Na promé lugá e subida di e asina yamá ‘rekenrente’ (e interes aktuarial), ku ta usa pa balorá e obligashonnan di penshun, ta hunga un papel importante. E ta ser kousá pa e subida di interes di merkado. Banda di esei PCN a logra un rendimentu di invershon positivo (te ku òktober esaki tabata 2,8%) den 2021. Un detaye remarkabel den esaki ta ku e invershonnan lokal a duna un tiki mihó rendimentu ku nos invershonnan internashonal. E grado di kobertura di PCN den òktober di e aña akí tabata 118,7%. Aña pasá na e alturanan akí e grado di kobertura ainda tabata 96,8%. Konforme eksigensianan di e Kuadro di Supervishon Finansiero BES (Financieel Toezichtskader BES) ku ta apliká pa e fondo, PCN mester tabata disponé di un grado di kobertura di 115%, pa por papia papia di sufisiente reserva i espasio pa indeksá total. Basá riba e aktual grado di kobertura PCN ta kumpli ampliamente ku e eksigensia akí i por hisa tur penshun i derechi ku 4%. Ku e desaroyonan akí PCN entretantu a sali tambe for di e periodo di rekuperashon kòrtiku. I esei ta bon notisia segun presidente di direktiva Harald Linkels. “E periodo ku a transkurí tabata turbulento pa motibu di COVID-19 i tur e kambionan riba tereno di penshun. Ta importante ku nos komo fondo di penshun a mantené nos mes bon riba pia pa nos partisipantenan i te asta ta kana dilanti riba e plan di rekuperashon riba término largu.“ Pa sali for di e plan di rekuperashon riba término largu, e grado di kobertura di nos fondo mester keda tres trimèster konsekutivo riba 115,1%. Di eseinan a kompletá e promé trimèster. Pero ku e desishon pa indeksá, e grado di kobertura ta baha atrobe algu bou di e mínimo rekerí. Direktiva ta akseptá ku pa e motibu akí ta dura un tiki mas largu pa sali kompletamente for di rekuperashon. Aña pasá tabatin asuntu di un inflashon negativo i pa e motibu ei no a indeksá. Den 2020 e indeksashon tabata 0,75% i den 2019 esei tabata 2%

Share This
error: Content is protected !!