Kralendijk – Tim di digitalisashon Entidat Públiko Boneiru a realisá diferente meta. Un meta prinsipal ku nan a realisá ta ku e tim di digitalisashon a integrá un módulo pa traha sita via e wèpsait nobo di Entidat Públiko Boneiru (EPB).

Habitantenan por traha un sita via e wèpsait pa servisionan ku e departamento di Registro Sivil ta ofresé. Te ku awe 10.256 sita a keda trahá na Registro Sivil. E departamento di Registro Sivil ta ofresé habitantenan di Boneiru mas posibilidat via e wèpsait. Awor tur persona por yena deklarashon di promé registrashon i reestablesimentu, petishon pa kopia / akta, deklarashon di mudansa, deklarashon di emigrashon riba e wèpsait.

Tambe tin otro prosesonan di departamento di Asuntunan Hurídiko i General ku a keda digitalisá. Habitantenan por hasi petishon via e wèpsait pa pèrmit pa bende produkto, benta di vürwerk, notifikashon di aktividat di Ordenansa General di Polis (kennisgeving activiteiten APK), pèrmit di bufèt, pèrmit di prekario, pèrmit di establesimentu, pèrmit di bibida i hóreka.

E meta prinsipal di e tim di digitalisashon ta pa via outomatisashon di e prosesonan di trabou engrandesé e efisiensia i forsa di ehekushon di e aparato públiko i mehorá e servisio den direkshon di komunidat di Boneiru.

Share This
error: Content is protected !!