Kachónan ku ta kana lòs a ataka hòmber

Riba djárason 15 di desèmber sentral di polis a risibí notifikashon ku kachó a ataka i morde un hòmber di 86 aña na Lagun Hill. Ambulans a transportá e víktima pa hospital pa tratamentu médiko. A papia ku doño di e kachónan i e lo a aserka dòkter di bestia pa pasa e kachónan angua.

 

Kandela na Jato Bako

Alrededor di 12.30 or di mèrdia riba djamars 14 di desèmber, sentral di polis a risibí notifikashon tokante un kandela den besindario di Jato bako. Aki a resultá ku tabatin algun outo bieu na kandela. A konsehá habitantenan den besindario pa sera porta i bentana pa prevení molèster di formashon di huma. Brantwer a paga e kandela. No tabatin herido.

 

Ladronisia for di vehíkulo

Riba djamars 14 di desèmber a drenta keho di ladronisia for di un outo ku tabata stashoná na e sitio di sambuyá ‘Weber’s Joy’. Entre 11.30 or i 12.15 or deskonosínan a bai ku un iPhone 12 plùs, un iPhone 10 plùs i sèn kèsh for di den e outo miéntras e doñonan tabata sambuyá. E outo no tabata na lòk. E kaso ta bou di investigashon.

 

Dama alkansá pa outo na Sabadeco

Den oranan di mainta riba djaluna 13 di desèmber, sentral di polis a risibí notifikashon ku outo a alkansá un dama na Sabadeco. Shofùr di un pikòp a deklará ku probablemente el a pega soño bou di stür dor di kua el a dal e dama ku tabata djòg. Personal di ambulans a asistí i trata e dama na e sitio mes.

 

A konstatá morto natural pa dama ku tabata pèrdí, Benjamina Neuman

Riba djamars 14 di desèmber, patólogo a konkluí outopsia riba e kurpa di Benjamina Neuman.

 

E dama tabata pèrdí pa 11 dia na momentu ku a bin topa kuné, morto den área di Bolivia. Mesora a konfiská e kurpa pa asina por a hasi outopsia.

 

E patólogo a deklará un morto natural ku probablemente lo a ser okashoná dor di desorientashon ku lo a kondusí na deshidratashon. E outopsia no ta duna niun indikashon pa investigashon mas aleu. Tampoko tin indikashon ku ta trata di violensia.

 

Molèster di vehíkulo den bario

Polisnan di bario a nota ku tin basta molèster kousa dor di vehíkulonan ta tuma lugá den barionan. En konekshon ku esaki paso a paso lo kuminsá ku kòntròl mas intensivo den barionan residensial. E barionan Nort Saliña, Hato, Nawati i Santa Barbara, ku ta kai bou di polis di bario Claudette Raphael, lo ta na turno promé.

 

E barionan Playa Pariba/ Playa Pabou  i Centrumgebied (Eugene Granviel), Belnem, Punt Vierkant, Sabal Palm, La Palma, Tera Kòrá (Ronald Schleper), Rincon, Tras di Montaña, Sabadeco (Victoriano Statie), Amboina, Bario Mexico i Den Stashi (Lee Anthony) lo sigui despues.

Share This
error: Content is protected !!