Kralendijk – Riba djaweps 16 di desèmber e tim di Water Circles a organisá un seshon di informashon online ku komunidat di yate di Boneiru. Durante e seshon STINAPA a presentá su konsepto di proposishon di kambio den e maneho di mara yate pa pasa nochi i tarifanan pa yate pasa nochi mará na lugá legalisá pa yate bishitante.

Un invitashon habrí pa e seshon akí STINAPA a kompartí adelantá di parti di e tim di Water Circles riba e página di Bonaire Cruisers Facebook. Mas òf ménos 20 persona a tuma parti na e seshon.

Na sèptèmber 2021 a publiká un investigashon ku Bonaire Boating Company a ehekutá na nòmber di e tim Water Circles.

E resultadonan i rekomendashonnan di e investigashon akí ku ta disponibel riba https://www.boneiruduradero.nl/wp-content/uploads/2021/09/Marine-Waste-Water-Survey-Bonaire-2021_def.pdf a kondusí na e echo ku STINAPA a evaluá e maneho di lugá di mara yate pa pasa nochi di nobo i a desaroyá un konsepto pa un maneho nobo.

 

E maneho proponé ta stipulá ku entrante 31 di mart 2022 yate sin tanki pa awa shushi, no por hasi uso mas di lugá di mara pa pasa nochi. Yate ku tanki pa awa shushi no mag laba nan tanki mas denter di un distansia di 12 mia for di kosta (loke ta legalmente prohibí for di 2010). Un otro regla proponé, ta ku habitantenan lokal (ku sédula) no por hasi uso mas di lugá di mara yate pa pasa nochi. STINAPA tin gana di bai kuminsá ku implementashon di un sistema online pa reservá pa lugá di mara yate.

Naturalmente tin gastu mará na e kambionan akí.

STINAPA i Harbour Village Marina, ku konhuntamente ta manehá e lugá di mara yate pa pasa nochi, den un karta di sèptèmber 2021 dirigí na Entidat Públiko Bonaire a supliká pa aprobá un oumento di e servisio di $ 10,00 pa $ 45,00 i pa implementá un seri di servisio adishonal, ku ta pas ku un volúmen abou, un prinsipio di márgen haltu i kolekshon di awa shushi i aprobá e servisio di chupa awa shushi di tur yate ku ta hasi uso di e lugánan di mara pa pasa nochi. E aktual sobrekargo pa mara pasa nochi di $ 10 pa nochi (ku segun STINAPA no ta kubri e gastunan aktual di operashon di e lugá pa mara yate), no a kambia durante un periodo di 16 aña for di aprel 2005, na momentu ku el a subi di NAFL 10,00 pa $ 10,00. E promedio di gastu pa un lugá di mara yate den e área di Karibe segun e wèpsait https://www.moorings.com/ ta USD $ 35,00 pa nochi, e gastunan den esaki ta varia ampliamente i ta subi tin biaha te na $ 60,00 pa nochi.

 

Durante e seshon tabatin hopi diskushon tokante e posibel efekto negativo pa ekonomia di Boneiru ora ku e gastunan di servisio lo kondusí nan un bahada di uso di lugá di mara yate, i konsekuentemente lo tin ménos gastu ku e yatenan bishitante ta hasi den negoshinan lokal.

Share This
error: Content is protected !!