Kralendijk – Patrick Martens, un di e dos finalistanan ku a sobra den e kompetensia di ‘Het Perfecte Plaatje’, a gana final di e programa di televishon hulandes akí na RTL4. Esaki tabata resultado di e episodio final festivo ku por a mira djárason 22 di desèmber na RTL4. Ku esaki a yega un fin na e di seis temporada di e shou, kaminda a graba e dòbel episodionan final na Boneiru. Den e episodio final Martens a kompetí kontra Frits Sissing. Komo ganadó di ‘Het Perfecte Plaatje’ dentro di poko Martens ta haña un reportahe den e edishon hulandes di National Geographic Magazine ku su seri di potrèt ‘ongerept Bonaire – Boneiru puro’. En total mas ku 2 mion televidente a mira tur dos episodio di ‘Het Perfecte Plaatje’ grabá na Boneiru.
Den e di dos parti di e transmishon final di ‘Het Perfecte Plaatje’ e finalistanan a haña diferente tarea pa saka potrèt ku nan mester a kumpli kuné na diferente parti di nos isla. Durante bahada di solo nan a saka potrèt di silueta, ámbos partisipante a saka potrèt di trahe di baño na sitionan fotogéniko i den un tríptiko nan a kapta e naturalesa puro di Boneiru, tantu riba komo bou di awa, por ehèmpel den Parke Nashonal Washington Slagbaai i na Klein Bonaire.
Durante e grabashonnan pa e di dos episidio final di ‘Het Perfecte Plaatje’ e finalistanan a hospedá na Villa Terras 2, ku a bira disponibel via Qvillas. E grabashonnan na Boneiru a bira posibel pa medio di patrosinio di Tourism Corporation Bonaire (TCB), e partner di akomodashon Delfins Beach Resort i e kompania di aviashon KLM. TCB ta gradisí tur otro partner na nos isla ku a koperá i ku di un òf otro manera a kontribuí na e grabashonnan durante filmashon di ‘Het Perfecte Plaatje’ na Boneiru.
Por mira e dos episodionan final di e di seis temporada di ‘Het Perfecte Plaatje’, kaminda Boneiru a hunga un papel prinsipal, online via rtlx.nl.

Share This
error: Content is protected !!