E muchanan di Orkesta di Mucha Boneiru i Talento Kultural a prepará un wikènt di konsierto pa selebra Pasku ku pueblo di Boneiru pero mester a kanselá esaki pa motibu di e situashon di corona riba nos isla.

Mesora dirigente di orkesta di mucha, sr. Dennis Aalse a bini ku e idea pa hasi un grabashon di e muchanan ku nan instumèntnan i boznan den un studio, akompañá pa nan dosentenan. A prepará e kantikanan i a hasi e grabashon durante di siman di 13 di desèmber. Dia 18 di desèmber tabatin un dia di filmashon na Rincon pa asina por a kompletá e grabashon musikal ku un videoclip. A hasi e filmashon na misa Katóliko di Rincon i dilanti di “Kas di Schermer”, un kas típiko di Rincon ku a wòrdu restaurá resientemente.

E videoclip a wòrdu realisá ku yudansa di Prins Bernard CultuurFonds Caribisch Gebied, Ministerie di Justitie, Ministerie di OCW i Openbaar Lichaam Boneiru.

Den e videoclip e 2 programanan, Orkesta di mucha i Talento Kultural, a bini huntu. Den tur dos programa muchanan ta siña toka un instrumènt, siña kanta òf siña baila, pero alabes tambe ta trein nan abilidatnan sosial, manera traha huntu, skucha otro, pasenshi i hopi mas. Orkesta di Mucha ta tuma lugá bou di ora di skol i Talento Kultural riba djasabra na Mangazina di Rei. Pa mas informashon tokante posibilidatnan pa partisipa na e programanan aki por tira un bista riba nos wèpsait www.mangazinadirei.org òf por tuma kontakto ku nos via info@mangazinadirei.org.

Ku e videoclip aki, ku por wak riba e facebook page di Mangazina di Rei, www.facebook.com/mangazina, fundashon Mangazina di Rei huntu ku tur mucha i nan dosentenan ta desea pueblo di Boneiru dushi dianan di fiesta i un prospero aña nobo.

Share This
error: Content is protected !!