KRALENDIJK – Bonaire Hotel and Tourism Association (BONHATA) a distribuí un enkuesta bou di su miembronan pa haña un mihó bista di e rekuperashon ekonómiko durante aña 2021, kompará ku 2019 i 2020 kaminda tabatin hopi pèrdida di benta.

Rekuperashon ekonómiko di sektor turístiko

73% di e miembronan ta indiká ku nan empresa a rekuperá atrobe pa loke ta trata benta. Kompará ku aña 2019 mas ku dos tersera parti (69%) di e miembronan tambe na e momentu akí tin asta un mihó benta. Aunke na kuminsamentu di e aña akí e

miembronan a indiká den un enkuesta ku na aña 2020 nan a sufri un promedio di pèrdida di benta di 61%, awor akí nan ta basta mas optimista atrobe. Esaki ta e motibu ku pa e temporada haltu akí kasi dos tersera parti di e miembronan (65%) ta verwagt ku nan lo tin un mihó benta kompará ku 2019. Sinembargo serka 8% di e miembronan benta no a rekuperá ainda di aña 2020.

Veroesjka de Windt, CEO di BONHATA, ta bisa: “Ku e resultadonan akí ku koutela nos por bisa ku mayoria miembro di BONHATA ta rekuperando atrobe despues di aña 2020. E pandemia di corona a afektá ekonomia di Boneiru seriamente, netamente pasobra turismo ta un sektor asina importante pa nos isla i pa motibu ku a deskurashá biahamentu. Aunke e pandemia di corona no ta tras di lomba ainda, nos ta mira ku e kantidat di buelo i e kantidat di bishitante a oumentá atrobe. Awor ku resientemente na Boneiru a anunsiá medidanan nobo pa bishitante for di Hulanda i Merka, nos tin ku warda pa wak si e temporada haltu ta bira loke nos a verwagt.”

Riba tereno di personal 42% di e miembronan no a rekuperá ainda i kasi un kuart (23%) ainda no por ofresé e mesun kalidat di servisio manera promé. Operashonalmente mayoria empresa tambe ta parse di a rekuperá atrobe. Solamente 12% di e miembronan ta indiká ku riba e tereno akí nan no a rekuperá ainda.

Na e akomodashonnan entre 8 i 17 di desèmber tin un promedio di okupashon di 74%. Kuater di e sinku miembronan di akomodashon ta indiká ku nan a rekuperá atrobe riba tereno di okupashon.

Variante di Omikròn

Den e enkuesta a hasi pregunta tambe tokante ekspektativa pa loke ta trata e variante di Omikròn. Sinembargo, for di e enkuesta ta resultá ku tin tiki preokupashon relashoná ku e variante nobo akí. Por ehèmpel solamente 15% di e miembronan ta pensa ku lo intensivá e medidanan na nos isla komo konsekuensia di e variante di Omikròn. Tiki miembro ta verwagt ku turistanan lo ta ménos dispuesto pa biaha i ku komo konsekuensia di esei ménos bishitante lo bini Boneiru (12%). Tiki miembro tambe ta verwagt ku ménos buelo lo tuma lugá (12%).

Nota: A ehekutá e investigashon akí promé ku e anunsio ku biaheronan for di Hulanda i Merka dos biaha mester hasi un tèst di PCR i un tèst propio.

Share This
error: Content is protected !!