Kralendijk – Aunke por lo general Kolegio Ehekutivo no ta bai den publisidat ku kasonan ku tin di haber ku asuntunan di personal, relashoná ku rumornan persistente i publikashonnan den medionan di komunikashon relashoná ku un medida di òrden ku a imponé riba un empleado públiko di Entidat Públiko Boneiru enkuanto e asina yamá fail di Chogogo, Kolegio Ehekutivo ta sinti su mes obligá pa duna un reakshon kòrtiku.

Punto di salida (manera ta standart den e relashon entre dunadó di trabou i empleado) ta ku tur empleado públiko ku ta traha na Entidat Públiko Boneiru tin un obligashon di sekresia. Esaki ta nifiká ku no ta pèrmití pa un empleado públiko kompartí informashon i dokumentu (konfidensial) ku otro persona (no outorisá) paden òf pafó di e organisashon di Entidat Públiko Boneiru. Violashon di e regla akí – ora ku esaki ta probá – ta kastigabel i fuera di esei ta nifiká tambe un inkumplimentu grave ku deber. Komo dunadó di trabou Entidat Públiko Boneiru ta tuma esaki hopi na serio.

Den e kaso akí a base di informashon ku Kolegio Ehekutivo a optené a surgi e sospecho ku e empleado públiko en kestion, ku ya kaba a tuma retiro riba propio petishon i pues de fakto no tabata traha mas na Entidat Públiko Boneiru, a hasi su mes kulpabel na violashon di obligashon di sekresia pa medio di kompartí informashon i dokumentu konfidensial ku otro persona (pafó di e organisashon di Entidat Públiko Boneiru). Pa por determiná si e sospecho akí tin sufisiente base real, Kolegio Ehekutivo a disidí pa laga un eksperto independiente hasi un investigashon forense. Ku bista riba e koutela i ophetividat ku mester tene kuenta kuné, Kolegio Ehekutivo ta haña di gran importansia pa warda riba resultado di e investigashon akí.

Teniendo kuenta ku e echo ku e investigashon akí ta entre otro dirigí riba e empleado públiko enbolbí den relashon ku su sitio di trabou, Kolegio Ehekutivo ta konsiderá ku no ta na interes di Entidat Públiko Boneiru ku e empleado públiko durante e investigashon ta presente / tin akseso na kanalnan di komunikashon ku ta mará na su (anterior) sitio di trabou. Den e kaso ei (pues den kuadro di interes di e investigashon) lei ta ofresé Entidat Públiko Boneiru e outoridat pa temporalmente nenga e empleado públiko akseso na e sitio di trabou, di manera ku e investigashon por tuma lugá den tur libertat. Durante e periodo di e medida di òrden akí e empleado públiko ta mantené tur fasilidat i derecho komo empleado.

Finalmente Kolegio Ehekutivo ta haña importante pa enfatisá ku empleadonan públiko (tambe) tin derecho, si no ta obligashon, di denunsiá (supuesto) iregularidat. Pa e asina yamá ‘batidó di klòk’ tin vários posibilidat dentro di Entidat Públiko Boneiru. Por ehèmpel na un manera seif empleadonan públiko por tuma kontakto ku funshonarionan di integridat ku ta spesialmente nombrá pa esei. I banda di esei naturalmente empleadonan públiko (meskos ku tur suidadano) ta liber pa akudí na Defensor Nashonal di Pueblo (Nationale Ombudsman).

Share This
error: Content is protected !!