Ku basta interés mi a lesa un artíkulo den Extra Boneriano ku a aparesé den e edishon di dia 15 di desèmber 2021. E artíkulo ta trese entre otro dilanti ku lo ta difísil pa e ántes kuerpo boluntario di Boneiru esta VKB, bini bèk pasobra e asuntu di arma ta keda un problema. Segun e hefe di Kuerpo Polisial Karibe Hulandes tin un lei nobo ku ta pone ku ta polis, Kmar i  algun funshonario di Duana so por karga arma, e artíkulo menshoná ta bisa.

Den un reunion di konseho insular na november 2019 tambe a menshoná e asuntu di Vrijwilligerskorps Bonaire (VKB) ku aparentemente a pèrdè pèrmit pa karga arma. Nan tabata duna kuerpo polisial un man i tabata traha ku polis ora di tene patruyá i kontrolá.Konseho Insular tabata kier sa kiko e status di VKB ta na e momentunan akí i si ainda ta eksistí un relashon di kooperashon entre direktorado di Òrdu i Mantenshon i polis. E dia ei tampoko un splikashon bon motivá a bin dilanti.

Komo ku mi tabata miembro di VKB te ora ku esaki a stòp di èksistí, i tumando na kuenta ku kada bes e tópiko di e kuerpo boluntario ta bin dilanti, mi a disidí di aklará un ke otro pa loke ta trata VKB. Adishonalmente mester bisa despues di 10 aña si te ainda ta menshoná VKB, ta un indikashon ku e kuerpo di un òf otro manera tabata sirbi un kousa den e komunidat boneriano.

E kuerpo Boluntario di Boneiru tabata un asina yamá ‘weerkorps’. E mihó tradukshon ta un kuerpo di milisia. Un milisia ta un grupo di suidadanonan ku a tuma sierto tareanan militar i para militar riba nan mes. Hopi biaha un  milisia ta konsistí di eks miembronan militar pero den e kaso di VKB, tabata krea su mes miembronan pa medio di un formashon militar inisial, pa despues sigui ku kursonan spesialisá konhuntamente ku e kuerpo di Kòrsou.

Un milisia na Boneiru sinembargo ta mará na lei. Den e kaso aki e Lei riba milisianan BES (Wet op de weerkorpsen BES). Por haña e lei aki via di e siguiente lenk: https://wetten.overheid.nl/BWBR0028240/2011-08-30, Un milisia riba e islanan BES te keda deskribí bou di artíkulo 1-c di e lei: un milisia ta kada organisashon di personanan privá, ku ta dirigí riba òf prepará pa realisá òf partisipá na aktividatnan den asistensia mutuo, òf asistensia riba su mes na ‘Nos Minister’ òf e komandante regional, òf na funshonarionan apuntá dor di nan. Den e kaso aki ‘Nos Minister’ ta e minister di relashonnan di Reino i asuntunan interno. E komandante regional ta e komandante di marina den Caribe apuntá pa e minister di defensa.

Nos minister por pone un milisia na disposishon di gezaghèber pa asistí e kuerpo polisial di e islanan pa mantené òrdu i trankilidat. Tambe por pone e milisia na disposishon di outoridatnan den kuadro di asistensia na momentu di desaster i krísis. Otro posibilidatnan mas ta keda deskribí den artíkulo 4.

Pero konforme artíkulo 2 ta prohibí pa lanta un milisia, partisipá òf duna sosten na esaki. E prohibishon menshoná no ta konta pa organisashonnan ku a keda atmití pa medio di un medida general atministrativo (algemene maatregel van bestuur). Laga nos bisa un dekreto. Na e atmishon di un milisia sierto kondishonnan por keda apliká. E ophetivo i e diseño di e organisashon tambe mester keda aprobá, pero esaki ta tuma lugá despues ku e kuerpo keda atmití pa medio di un dekreto. Naturalmente un kuerpo atmití ta haña supsidio di e gobièrnu di Hulanda pa nan ta prepará riba nan tarea i mantené nan material.

Nos ta yega na e pregunta kon tur esaki ta hinká den otro pa loke ta trata VKB? Mester bai den e kaso aki na un desishon pa ku milisianan BES (Besluit op de weerkorpsen BES). Por haña e desishon aki pa medio di e siguiente lenk: https://wetten.overheid.nl/BWBR0028240/2011-08-30. Artíkulo 9, insiso 1 di e desishon menshoná ta trese dilanti ku, diferente na artíkulo 2, insiso 1, 2, i 2a, organisashonnan konosí komo ‘Vrijwilligers Korps Bonaire’ i Vrijwilligers Korps St. Eustatius, ta keda atmití komo un milisia den sentido di artíkulo 1, parti c, di e lei riba milisianan BES, pa un durashon di 6 luna despues di 10.10.10. Artíkulo 9 insiso 3 ta bisa ku e término menshoná un biaha so por keda alargá ku un periodo di máksimalmente 4 luna.

E konklushon ta ku VKB a keda atmití pa un periodo di 6 luna despues di 10.10.10. Kondishon di atmishon menshoná ta ku e kuerpo mester sòru pa kumpli ku tur eksigensianan pa atmishon komo milisia konforme artikulonan 2, insiso 2 i 2a, i insiso 1 i 2. E di dos konklushon ta ku e mando di VKB no a kumpli ku e kondishonnan di atmishon, òf no a haña sosten pa esaki, i despues ku e término pa kumpli a vense, outomátikamente VKB a stòp di èksistí. Pues ningun momento eksistensia di VKB no tabata mará na ningun lei pa karga arma si òf nò.

Un otro pregunta ta kon pa sigui? Un kuerpo boluntario ta esensial tumando na kuenta ku den tempunan di desturbio i krísis nan por sostené polis, aduana, Kmar, JICN i hasta marina i ehérsito real. No mester lubidá ku e kuerponan tambe mester di sosiego òf di otro forma lo por falta personal, i un kuerpo bolutario por yuda den esaki. Na Saba i St. Eustatius tambe por despachá miembronan di e kuerpo boluntario di Boneiru pa asistí.

Nos tur por a tuma nota ku dor di kambionan klimatológiko mas i mas e chèns pa un orkán fuerte i subimentu di e nivel di laman ta un riesgo grandi pa loke ta trata desasternan ku por asotá Caribe en general i e tres islanan di BES en partikular, kousando krisis. Un tarea importante di e kuerpo boluntario ta pa asistí ora tin desaster i yuda kombatí desaster. Den tempunan asina un kuerpo boluntario manera VKB ta indespensabel. Ningun otro kuerpo no ta ekipá pa durante un temporado largu sigui funshoná. Ta dura tempu pa refuerso èkstra yega for di pafó. E isla por keda basta dia isolá. Pues un kuerpo boluntario lo ta un alivio grandi.

E persona ku por inisiá un atmishon nobo di VKB ta gezaghèber di Boneiru sostené pa konseho insular di Boneiru i kolegio ehekutivo. Despues di 11 aña di 10.10.10 tin un otro persepshon pa loke ta trata un VKB i konhutamente ku Hulanda mester investigá un ligimitashon di un kuerpo boluntario aki na Boneiru.

Share This
error: Content is protected !!