Kralendijk – Ta mi kustumber pa ora aña bòltu mi deseá tur hende un aña kargá ku dicha, felisidat i prosperidat. E aña akí mi tin ún deseo mas: Ku kada un di nos ku ta biba na Boneiru òf ta di bishita keda bon di salú.

 

Mi ta ekspresá e deseo akí komo ku na kabamentu di aña 2021, e variante omikron di e virus di corona a yega Boneiru. Departamento di Salubridat Públiko a deklará den e siman ku ta tras di lomba ku nos mester tene kuenta ku e kantidat di kontagio ku e variante di omikron ta subi lihé. Delaster dianan nos a mira klaramente un oumento di e kantidat di hende den isolashon, esta di persona ku por pega otronan.

 

Awe tin 262 hende den isolashon na kas relashoná ku kontagio ku corona. Esaki ta basta mas ku delaster simannan. E kantidat di kontagio nobo den e delaster dianan ta subi klaramente. Tin 4 hende hospitalisá ku COVID-19. Di kada 10 persona ku a a pega ku e vírùs rùim un siman pasá, 5 – 6 persona a pega ku e variante di omikron. Nos ta ferwagt ku e kantidat di kontagio awor akí ya kaba ta muchu mas haltu.

 

Salubridat Públiko ta tene kuenta ku nos lo bai tin un pik atrobe den e kantidat di kontagio. Un pik por nifiká ku mas hende ku pega ku e vírùs mester bai hospital na nos isla. Preshon riba hospital i otro partinan di kuido ta subi e ora ei.

 

P’esei for di desèmber 2021, Salubridat Públiko ta dunando mas tantu persona posibel e chèns pa nan haña e angua di buster lihé pa nan ta mihó protehá. Salubridat Públiko ta duna oportunidat tambe na personanan ku no a pasa e di promé òf di dos angua di corona pa nan hasi esei ainda. Ku e angua di buster i e dos anguanan di corona e  departamento ke protehá siudadanonan mihó pa nan no bira gravemente malu si nan pega ku e variante di omikron.

 

E luna akí ta prolongá e oranan pa pasa angua pa personanan ku no a pasa e angua di buster òf e di promé òf e di dos angua kontra corona ainda. Ta anunsiá prolongashon di e oranan pa pasa angua e siman akí. Pa mas informashon: www.boneirukrisis.com

 

Mi ke para ketu un ratu na órden públiko. Durante kambio di aña tabatin masha hopi hende a bini huntu  den Centrumgebied i na algun playa públiko.

 

Awor ku e variante di omikron ta na Boneiru, ta mas importante ainda pa hende no bini huntu den grupo grandi. Ta importante pa tur hende asumí nan responsabilidat i tene nan mes na reglanan.

 

Den e situashon ku nos ta den awor, nos mester tuma medida nobo pa redusí kontakto entre persona i redusí e chèns ku e vírùs por plama fásilmente. Pa e motibu akí entrante  4 di yanüari 2022  00:00 or e  siguiente medidanan ta drenta na vigor. Nan ta keda na vigor te ku 4 di febrüari 2022.

 

Pa enkuentro den seno privá tin un máksimo di 10 persona, ku ta pertenesé na maksimalmente dos kas di famia.

 

Tur establesimentu di hóreka mester sera 00.00 or di anochi, ta permití 4 persona adulto na lugá fiho na kada mesa.

 

Ta permití evento pafó ku un máksimo di 50 persona. Públiko presente no tin mag di kanta ni baila i esnan presente mester sinta na lugá fiho.

 

Ta permití 1 persona so di kas di famia òf grupo na tur tienda i pakus. Ke men ku bo no por bai supermerkado por ehèmpel den grupo, ni ku dos òf mas hende. Por hasi eksepshon pa personanan ku tin problema pa hasi kompra nan so. Por ehèmpel mayornan soltero òf siudadanonan ku un limitashon físiko ku mester di ayudo ora di hasi kompra.

 

Na entiero òf kasamentu ta permití un máksimo di 50 hende durante e seremonia ofisial, tur hende presente mester mantené un distansia di 1,5 meter. Ta konsiderá tur otro aktividat relashoná ku entiero òf kasamentu komo enkuentro privá. Ta permití na e aktividat aki pues un máksimo di 10 persona adulto di dos kas di famia.

 

No ta permití públiko na aktividat òf evento deportivo paden. Pafó tin mag di tin un máksimo di 50% di e kapasidat di hende. Tur hende mester mantené un distansia di 1,5 meter.

 

Por sigui praktiká deporte.  Ta konsehá enfátikamente pa praktiká deporte pafó.  Skolnan di deporte por keda habrí tanten ku tur esnan presente por mantené 1,5 meter di distansia. Ta konsehá urgentemente pa skolnan di deporte laga aire pasa regularmente den tur espasio.

 

Casino mester sera 12 or di anochi.

 

Establesementunan di plaser mester sera.

 

Tin algun medida ku tabata na vigor kaba. P’esei mi ta bolbe hasi un yamada serio na tur dunadó di trabou pa si por,  laga nan personal traha mas tantu ku ta posibel na kas. Na pasadia pa nos grandinan tur hende mester tene nan mes na e reglanan básiko. Tur persona ku un profeshon di kontakto manera hasidó di kabei, masahista, fisioterapista, mester bista tapaboka na trabou.  Ta konsehá i pidi tur iglesia enkaresidamente pa no kanta durante misa òf sirbishi i pa tene nan mes na e reglanan básiko.

 

Tur diskotèk ta keda será.

 

Nos ta sigui monitoriá e situashon i si ta nesesario nos lo suavisá e medidanan òf bini ku medida mas pisá.

 

Den pasado nos a adaptá e kondishonnan pa biahero ku ta bini Boneiru pa asina nos por a slow yegada di e variante di omikron na nos isla.  Awor ku nos tin e variante di omikron na nos isla, nos lo mester bolbe wak e kondishonnan pa biaha bini Boneiru. Boso ta tende pronto mas di esaki.

 

Tin basta bishitante ku ta bini nos isla awor hustamente pa skapa un lockdown òf otro medida pisá na nan pais. Mi ta hasi un yamada serio na tur bishitante pa por fabor yuda tene nos isla seif. Kompará ku un pais den lockdown, e situashon na Boneiru ta parse kisas trankil. Pero esei no ta e kaso! Manera mi a bisa kaba, omikron ta na Boneiru. I omikron ta menasá nos tur! Wak pa abo no ta e bishitante ku ta peligra nos salú. Por fabor! Tene bo mes na e regla i medidanan. Bo  por lesa tur e medidanan na www. www.boneirukrisis.com

 

E medidanan nobo i esnan ku nos tabatin kaba, ta yuda nos mantené nos isla mas seif ku ta posibel. Mi ta konsiente di e sakrifisio ku nos pueblo mester hasi pa kumpli ku e medidanan obligatorio.

 

Mi ke pidi kada un di boso pa ban e mia èkstra ku nos. E no ta fásil, pero e ta nesesario. I ora nos kada un sakrifiká i kontribuí di su banda, despues di tempu lo por adaptá e medidanan aden asina ku e situashon ta permití.

 

Si bo no a pasa angua di buster ainda, òf e di promé òf e di dos angua di corona, bai hasié! Yama e number grátis 0800 0900 i traha un sita. Bo tin keho? Keda kas e ora ei i laga nan tèst bo mas pronto ku ta posibel. Yama e number grátis 0800 0800 pa traha un sita pa tèst.

 

Mi tin salú di tur residente i bishitante di Boneiru na pechu. Nos tur tin e responsabilidat pa tene nos dushi Boneiru seif i salú.  Kumpli ku e medidanan nobo i e reglanan básiko manera evitá di ta of bini huntu den grupo grandi,  laba man regularmente i  tene distansia di 1,5 meter. Ta na abo i ami pa sòru ku residente i bishitantenan di Boneiru ta salú i ta keda bon di salú. Un biaha mas Bon Aña!

Share This
error: Content is protected !!