Resientemente Bonerinaanse Sport Federatie (BSF), ku ta e federashon madre di deporte aki na Bonaire, ku tin komo un di su metanan pa sali na vanguardia di su miembronan, a risibí e informashon ku preisnan pa inskribí/registrá na Kamara di Komersio (KvK) lo bai subi entrante promé di yanüari 2022 tambe pa federashon nan di deporte di Boneiru. BSF den representashon di un gran mayoria di su miembronan, a tuma nota di e subida di preis aki, i pa medio di un karta dirigí na KvK e siman aki a informá nan ku nos miembronan no ta di akuerdo ku e subida aki. Mirando ku ningun federashon di deporte no ta risibí supsidio di ningun organisashon ni di Gobièrnu di Boneiru, manera ta kustumber na Hulanda pa federashonnan di deporte, ademas e federashon- òf klupnan ta haña ku KvK no tin ningun balor adishonal agregá pa ku nan deporte, komo tal BSF representando e federashonnan deportivo di Boneiru, no ta di akuerdo ku e subida aki i ta deseá pa por haña un sita ku KvK i hiba un kombersashon ku pa por papia riba esaki i pa wak si por yega na un otro palabrashon òf akuerdo pa tur federashonnan di deporte aki na Bonaire. Un di tarea nan ku KvK tin pa su miembronan ku ta inskribí serka nan ta, pa promové tur federashon di deporte tantu lokal komo internashonal, lamentablemente esaki no ta pasando pa ku deporte, ademas KvK tampoko no ta yuda e federashon- òf klupnan pa yega na fondo òf yudansa pa por traha riba nan statutonan i otro dokumentonan pa nan por registrá na KvK i tambe pa por buska fondo pa sigui promové deporte. Deporte na Boneiru a bira un di e medio nan mas esensial pa ku kombatimentu di problemanan bou di nos hóbennan, ta bon pa menshoná ku deportenan na Boneiru ta funshoná a base di forma boluntario. Ta asina ku kasi tur organisashon deportivo no ta kobra kontribushon na nan miembronan. Pa e motibunan aki mes nos ta kere ku no ta hustu pa kobra sumanan kuantioso pa ta inskribí na KvK, sin ku ta risibí nada bek. Nos ta spera ku KvK ta konsiente ku si e organisashonnan deportivo stòp ku nan trabou boluntario pa ku e hubentut, e hóbennan lo bai skohe e kaminda robes, ku por tin konsekuensianan fatal i desastroso pa nos hóbennan i komunidat, i si esaki pasa, ningun kas o negoshi lo ta safe i sigur mas na Boneiru i asta nos hóbennan ku ta futuro nan di Boneiru, por resultá den prison. Nos ta kere ku ningun instansia òf hende lo ke esaki, komo tal nos ke pidi koperashon i komprenshon pa e ku e kobransa na e federashon- i klupnan deportivo. BSF ta spera mas pronto posibel por haña un sita ku KvK pa por papia riba e tópiko aki, di manera ku nos por informá nos miembronan di e resultado di nos sita i kombersashon ku KvK. BSF tei bek pa sali na vanguardia di tur su miembro nan i esaki ta e promé mandato ku BSF a risibí di parti di su miembro nan pa atendé pa nan, i nos di bestür sigur ta mira esaki komo algu importante pa nos miembro nan mirando ku si nos ke pa federashonnan deportivo por ofisialisá i registrá nan mes na Kvk, mester tene kuenta ku e preis ku lo bai kobra pa inskripshon. Sigun e presidente di BSF Eric Soleana, KvK mester tene kuenta ku federashon ku ya kaba tabata paga basta sèn pa nan por ta registrá na Kvk, mester bini un maneho pa por tin diferensia entre instansianan ku ta hasi negoshi pa hiba ganashi, i ku federashon/ klupnan nan di deporte ku ta ofresé deporte na nos hóbennan pa nan propio desaroyo mental i físika, no por pone federashon nan di deporte riba e mesun nivel di kobransa ku un kompania. Señor Soleana ta sera e komunikado bisando ku e ta spera pronto riba un sita ku KvK i ta deseá henter e pueblo di Bonaire engeneral  i e deportistanan en partikular tur kos bon den aña 2022.

Share This
error: Content is protected !!