Kralendijk – “A bira tempu pa kuminsá pensa riba un destinashon alternativo pa e tereno di BOPEC.

For di tempu ku e empresa na mart aña pasá a bai ku bankarota, no a bin ningun bista  tokante  un eventual doño nobo, ku ta deseá di bai hasi uso di e fasilidatnan, segun diputado James Kroon.

E chèns tei te ainda ku por haña un doño nobo,segun diputado James Kroon, ta chikitu. No opstante ku den e sektor aki, ku pa motibu di e preis nan haltu di petrolio riba e merkado mundial, bo por gana hopi plaka ainda, ningun kumpradó interesá serio no a mèldu su mes ainda. Tira  un bista riba Korsou i Aruba; ayanan e refinaderianan ta para ta frusa i kaba na nada. Pakiko nos mester bai invertí den kombustibel di fosil, miéntras nos ta mei mei di un transishon pa un mundu liber di CO-2?  Sr. Kroon ta mustra riba e echo ku e estado den kual e instalashonnan riba tereno di BOPEC ta aktualmente no ta sin peliger.

For di promé ku e estado di bankarota e situashon tabata prekario pa motibu di falta di mantenshon. Esaki a sigui bai mas atras denúltimo dies lunanan. Un re-apertura di e aktividatnan di depósito lo bai kosta kisas diespiku miyon. No opstante kon duru e kurator hasi su esfuerso, su búskeda pa un eksplotadó lo no tin resultado. Pa un re-apertura tin nesesidat tambe di personal spesialisá.

Mayoria di e eks empleadonan a kuminsá traha otro kaminda i no ta dispuesto di bai kuminsá ku un aventura insigur. Tambe serka nos tin e ambishon pa konbertí nos mes den e asina yamá “ BLUE  DESTINATION “. Den e sentido ei, poniendo tur kos riba un rei, lo ta mihó pa kuminsá pensa riba un futuro nobo pa e área rondó di BOPEC ku ta pertenesé na e Boneiru duradero.

Esaki ta e momento apropiá, Kroon ta enfatisá, “ E Gabinete Rutte IV a anunsiá den nan akuerdo di gobernashon   ku lo bai invertí èkstra den e ekonomia di Hulanda Karibense. Lo mi kier gara e oferta aki ku dos man dor di proponé huntu ku e ekspertonan di e diferente ministerionan pa utilisá e tereno di BOPEC pa e desaroyo di un pilá ekonómiko nobo, di tal forma ku nos ta bira ménos dependiente di solamente turismo.

Diputado Kroon ta pensa entre otro riba fasilidatnan di haf pa e aktividatnan di depósito i “ ponementu/wardamentu di kònteiner. Barkunan grandi ta trese kònteiner, ku despues ta ser transportá ku barkunan mas chikitu na destinashonnan den region. Teniendo na kuenta ku nos kier saka e transporte di produktonan di uso personal for for di sentro di Kralendijk pa motibunan di seguridat, por pone esakinan tambe na e lokashon di BOPEC.

E efekto di “SPIN-OFF”  lo ta grandi. Un bes nos ta un “hup” pa depósito, bo por probechá di diferente manera. Bo por establesé por ehèmpel un sentro di resiklahe pa region. E problema di e islanan ta ku nan oferta ta muchu chikitu pa por hasi esaki den un forma rendabel. Pero si por akumulá di diferente isla tur material pa resiklá na un punto sentral i ehersé e trabounan einan, e ora ei si bo tin un bon negoshi. Bo mester regl’é bon si, ku bo ta risibí solamente produkto ku den un forma duradero i sostenibel por ser prosesá. No por ta asina ku na final di e proseso nos ta keda sintá ku yen porkeria.

E promé enkargo pa e sentro di resiklahe ta e desmantelashon di e instalashonnan. Ta un trabou hopi pisá, segun Sr. Kroon, ku ta konvensí ku tin hopi mas posibilidat ku nos por pensa riba. ”P’esei mi kier hasi bon uso di e sentido di kreatividat den nos propio komunidat. Pa kuminsá mi ta bai invitá e grupo di  DIALOGO Sentral pa pensa huntu, pero tur hende ku tin un bon idea, naturalmente ta bon biní”. Paralèl ku esaki , Kroon ta bisa, mester investigá si kisas eventualmente tin tereno sushá ku mester deshasí di dje.

Share This
error: Content is protected !!