Kralendijk – Durante inisio di e ‘Dianan Nashonal Di Lesa Pa Mucha Tende’ diputado Nina den Heyer a hasi entrega di e promé Maletin ku Buki grátis na beibi Arian.

Den e Maletin ku Buki tin dos buki prèt. Serka kada buki nan a kompilá vários tep práktiko i dibertido tokante kon pa lesa pa mucha tende. Wak den e buki ku bo a haña den bo maletin. E ora ei di mes bo ta wak kiko asina bo por hasi kuné!

Bai ku bo beibi òf chikitin biblioteka tambe, hasié miembro i risibí e Maletin ku Buki grátis. Despues bo ta bishitá e Huki di Maletin ku Buki den biblioteka i wak kua ta e bukinan nobo i prèt ku abo i bo yuchi por deskubrí!

Lesa un buki huntu – mustra plachi i konta storia – ta fortifiká e laso ku bo beibi i chikitin. I muchanan ku komo beibi a tende bo lesa pa nan, despues ta bira mihó den idioma. Nunka no ta tempran di mas pa kuminsá ku lesa pa mucha tende.

Miembresia di biblioteka ta grátis pa mucha te ku 18 aña. Ku un miembresia bo por fia kuater buki pa un periodo di tres siman.

Nos ta mira otro den biblioteka na Kaya Gramèl s/n.

Share This
error: Content is protected !!