Kralendijk – Tourism Corporation Bonaire (TCB) huntu ku su partnernan Entidat Públiko Boneiru, BONHATA, Bonaire International Airport (BIA), Diamond PR i kapitan di haf a tene su konferensia di prensa di kada tres luna pa duna un bista general di e prestashonnan di turismo durante aña 2021 i di e perspektivanan pa aña 2022. Un análisis remarkabel ku a kompartí durante e konferensia di prensa ta e echo ku na aña 2021 Boneiru a yama bon biní na 111.000 yegada ku avion, loke kompará ku aña 2019 a resultá den 70% di rekuperashon di nos turismo.

Banda di implementashon di un impuesto nobo di turista (entry tax), e enfoke di Entidat Públiko Boneiru durante aña binidero lo ta riba hañamentu di un bon balansa entre turismo i bienestar di nos komunidat. ‘Durante e aña tras di lomba ònverwagt Boneiru a bira enormemente popular serka bishitantenan i invershonistanan. Komo konsekuensia di esaki nos merkado laboral ta sobrekargá ku entrada di forsa laboral for di den eksterior i nos habitantenan tin problema pa haña bibienda pagabel. Entidat Públiko Boneiru lo tuma medida tambe pa ofresé nos hendenan bon posibilidat di formashon riba tur nivel i pa stimulá nos habitantenan pa haña un trabou den sektor turístiko, pero tambe pa hasi nos kultura, nos historia i nos naturalesa parti di programanan di enseñansa, ku komo meta pa sigurá nos identidat i un futuro duradero’, segun Hennyson Thielman, diputado di Desaroyo Ekonómiko i Turismo.

Direktor di Tourism Corporation Bonaire, sr Miles Mercera, a bisa ku e meta ta pa alkansá 100% di rekuperashon di nos turismo na fin di aña 2022. Rekuperashon di nos turismo mester kontené kambionan struktural pa loke ta trata e manera ku nos ta posishoná nos isla i e merkado ‘niche’ ku nos ke atraé. Na luna di mei 2022 TCB ta spera pa den koperashon ku su stakeholdernan introdusí un direkshon nobo pa ‘branding’, siguí pa lansamentu di su wèpsait nobo na luna di yüli 2022. TCB a mustra kuantu dia promedio un bishitante ku ta biaha for di Hulanda pa Boneiru tin mester pa tuma e desishon real pa biaha. Na aña 2022 esei ta 49 dia, kompará ku 69 dia na aña 2021. E promedio di kantidat di anochi na nos isla ta 17,6 anochi, di kua mas ku 50% ta keda 14 anochi. E promedio di kantidat di anochi pa e merkado norteamerikano ta 10,1 anochi, di kua 67% di nos bishitantenan for di Merka ta keda entre 4 i 7 anochi.

Veroesjka de Windt, direktor di BONHATA, a trese dilanti ku e promé kuartal di aña a bai bon pa sektor di turismo na Boneiru, ku un grado di okupashon promedio di 82% i un tarifa di dia promedio di $ 231. For di luna di yüli 2021 no tabatin un ‘slow season’. For di e tempu ei e sektor a sigui traha sin interupshon. Un rekuperashon nesesario, pero tòg fantástiko si nos kompará esei ku aña 2021, kaminda e okupashon promedio den e promé kuartal tabata mas òf ménos 27% ku un tarifa di dia promedio di $ 170. No solamente e akomodashonnan ta laga nos mira sifranan positivo, pero tambe e restorantnan, kompanianan di hür outo, tráfiko krusero, tournan i otro aktividatnan riba nos isla tabatin mihó resultado. E perspektivanan di BONHATA pa e di dos kuartal di 2022 ta mustra un bahada leve di mas òf ménos 1 % pa e lunanan di aprel i mei. E grado di okupashon ku nan ta verwagt ketu bai ta rònt di 80%, loke ta keda riba e promedio di e sektor.

Onno de Jong, direktor operashonal di BIA a bisa ku Bonaire International Airport, despues di un periodo largu di un bahada fuerte di kantidat di pasahero, den e di dos mitar di 2021 a konosé un kresementu fuerte di e kantidat di pasahero. Den e promé mitar di 2021 BIA a prosesá mas ku 34.000 pasahero ku a yega i mas ku 34.000 pasahero ku a sali. Den e di dos mitar e kantidat akí tabata kasi 95.000 pasahero ku a yega ku un total di 93.000 pasahero ku a sali. BIA ta koutelosamente optimista tokante e prognóstikonan pa 2022, pero e skemanan di buelo i e desaroyonan turístiko na Boneiru ta mustra hopi positivo. Air Belgium ta kuminsá ku un ruta nobo for di Brussel pa Boneiru. Tambe BIA a konstatá un kambio den repartishon di buelonan di kombinashon, kaminda kada biaha mas pasahero ta skohe pa desembarká na Boneiru.

Kapitan di haf, sr Gunther Flanegin, a presentá e sifranan mas resien relashoná ku e kantidat di barku krusero i e kantidat di pasahero pa e lunanan di yanüari, febrüari i mart 2022. Tambe e kapitan di haf a duna informashon tokante e skema pa e ‘low season’ binidero  i e protokòlnan di Covid ku ta na vigor. Boneiru a yama bon biní na 23 barku krusero den luna di yanüari, 27 den luna di febrüari i 21 den luna di mart 2022. Na e momentu akí tin 17 barku krusero planiá pa luna di aprel, 9 pa luna di mei i 8 pa luna di yüni 2022.

Komo parti di e Plan di Rekuperashon pa Turismo e stakeholdernan a kuminsá ku e konferensianan di prensa konhunto di kada tres luna tokante turismo, ku komo meta pa promové e kolaborashon i informá nos komunidat lokal tokante e desaroyonan den sektor turístiko. Den koperashon ku su stakeholdernan TCB lo keda informá nos komunidat kada kuartal tokante e desaroyonan, oportunidatnan i desafionan den sektor turístiko.

Partnernan ta: OLB, BONHATA, BIA, Kapitan di haf i TCB.

Share This
error: Content is protected !!