Kralendijk – Un prensa liber i krítiko ta importante pa Boneiru. Asina Kolegio Ehekutivo a deklará relashoná ku Dia di Prensa. Prensa ta sigui desaroyonan riba e isla, i kaminda ta na su lugá, ta hasi pregunta. Ta importante pa prensa kuestioná kasonan ku no por soportá lus di dia i ku prensa ta tribi hasi pregunta tokante esaki. Un prensa krítiko i skèrpi ta tene esnan ku ta dirigí nos isla i otro instansia skèrpi. Por konsiderá un prensa liber komo un pilá importante di nos sistema demokrátiko.

Promé di Sèptèmber, Boneiru ta selebrá dia di prensa, 3 di mei ta dia internashonal libertat di prensa. Prensa ta hunga un ròl masha importante, momentu ta trata pa informá pueblo. Prensa ta hunga un ròl importante ora ta trata di splika òf komuniká vishon di gobièrnu òf e maneho ku gobièrnu ta hiba.

Ehèmpelnan resien kaminda prensa a hunga un ròl importante ta implementashon di lei di tráfiko nobo, i e esfuerso pa hasi i tene nos isla limpi. Momentu ta trata kalamidat ku ta menasá òf ta pasa realmente, prensa ta hunga un ròl hopi krusial i indispensabel. Asina pueblo ta keda informá di e último  desaroyonan.

Apesar di un poblashon no grandi, Boneiru konosé tòg un prensa hopi aktivo i variá. Den esaki pa hopi tempu kaba radio emisora i korant ta hunga un ròl importante. Awendia tin vários emisora lokal di televishon, miéntras ku medionan riba Internèt ta birando mas i mas importante.

Algu ku ta sosodé na e momento akí, dentro di 5 minüt por ta “online” den medionan di notisia riba Internèt. Esaki ta trese retonan nobo kuné tambe. No tur kos ku publiká òf kompartí riba Internèt ta notisia verídiko. Sinembargo ta nèt esaki ta pone tambe ku prensa di kalidat, ku sa di distinguí entre echo i informashon, rumor sin base, òf asta notisia falsu, ta mas importante ku nunka. Ta p’esei Kolegio Ehekutivo ta yama pabien na prensa riba e dia ku ta selebrá importansia di prensa. Masha pabien

Share This
error: Content is protected !!