KRALENDIJK – Djárason último den oranan di anochi, promé ku e partido final pa e prome Super Cup 2019 entre e ekiponan di Real Rincon i Estrellas, tabatin e apertura ofisial di kampionato futbòl 2019-2020 di nos isla.
Esaki a inisiá ku desfile di rèfrinan i e 10 ekiponan ku ta den e próksimo temporada di futbòl, unda e ekiponan a marcha subi tereno di wega di Stadion Antonio Trenidad na Rincon i posishoná nan mes meimei di tereno.
Aki e presidente di di FFB, sr. Ludwig “Luti” Balentin, a hiba palabra i dirigí su mes na e ekiponan presente, i tambe e fanatikada di futbòl ku tabata presente.
Kordinadó di kampionato ku ta sr. Patrick Mariana tambe a dirigí su mes na e ekiponan.
Sr. Balentin den su diskurso a pidi e ekiponan pa demostrá futbòl i no lubidá ku e ekipo ku hunga mihó i hinka gol ta gana.
Tambe e la hasi yamada na e fanatikada pa kòrda riba komportashon, apoyando bo ekipo faborito na un manera bon sin insulto.
