KRALENDIJK – FLTD a aserká MBO ku e petishon pa laga studiantenan di departamentu di karpinté traha 12 kashi di buki pa por regalá 12 krèsh. Pa e proyekto aki FLTD a kumpra e palunan ku ta nesesario pa por traha e kashinan. E intenshon di e proyekto aki ta pa siña i stimulá nos muchanan lesa for di edat hopi yòn. Tambe pa motivá lidernan di krèsh pa lesa mas tantu ku e muchanan p’asina nan por lanta ku amor pa lesa i sigui desaroyá positivamente. E trahamentu di kashi a bira un proyekto pa e studiantenan di MBO. E studiantenan ta bou di guia di mener Martijn Babtiste i mener Arnold de Jong. Durante siman di buki for di 12 di novèmber te ku 15 di novèmber, e studiantenan, nan dosentenan i representantenan di FLTD lo entregá e kashinan i bukinan. Dia 15 di novèmber pa 2or di atardi lo entregá e último kashi di buki i bukinan na Na schoolse opvang E Shoko Sabi, ku ta keda na St Dominicus School. Pa e okashon akí nos ke invitá Prensa pa ta presente. Direktor di MBO, señora Liset de Keijzer i presidente di FLTD, señora Eileen Croes-Piar, tambe lo ta presente. FLTD ta gradisí MBO pa nan gran koperashon den e proyekto akí. Tambe nos ta gradisí Biblionef Bonaire, Fundashon Alzheimer Bonaire i Fundashon Lesa i Skibi ku a sòru pa un gran parti di e bukinan. Kooyman a regalá MBO fèrf pa por a fèrf e kashinan.

Share This
error: Content is protected !!